Şehîd Mihemed El Ilêwî li Tirbespiyê hate veşartin

Pêkhateyên navçeya Tirbespiyê ya kantona Qamişloyê cenazeyê Mihemed El Ilêwî li Goristana Şehîd Dilşêr a li gundê Dugirê yê li rojavayê Tirbespiyê veşart. Mihemed El Ilêwî 5′ê Cotmehê li mala xwe di êrişa hewayî ya dewleta Tirk a li nêzî stasyona petrolê ya li bakurê Tirbespiyê de şehîd bû.

Di merasîmê de endamê Meclisa Mablatên Şehîdan a Tirbespiyê Nûredîn Şakir êrişên artêşa Tirk a dagirker ên li dijî herêmên Bakur û Rojhilatê Sûriyeyê şermezar kirin û got, bêdengiya navneteweyî ya li hember êrişên dewleta Tirk nîşan dide ku ew di êrişên dagirkeriyê de şirîk in.

Nûredîn Şakir got, pêkhateyên Bakur û Rojhilatê Sûriyeyê li dijî êrişan yek in û dê têkoşîn û berxwedanê mezin bikin.

Endamê Koordînasyona Tevgera Civaka Demokratîk (TEV-DEM) Ayid Îbrahîm hedefgirtina welatî, avahiyên enerjî û xizmetguzariyê wekî sûcekî şer nirxand û anî ziman ku dewleta Tirik bi pêkanîna van sûcan dixwaze îradeya gel bişkîne.

Îbrahîm soz da ku ew ê destkeftiyên şehîdan biparêzin û têkoşînê bidomînin ta serkeftinê mîsoger bikin. Ayid Îbrahîm got: ′′Vîna gelan wê bi ser bikeve."

Di dawiyê de wesîqeya şehîd hate xwendin û radestî kurê wî Muitesim El Ilêwî hate kirin. Cenazeyê şehîd li goristanê hate veşartin.

(fr)

ANHA