‘Armanca xirakirina perestgehan koçberkirina êzidiyan e’

Beriya çend rojan li ser medyayên dîjîtal wêneyên xirakirina perestgeha Şêx Hemîd a êzidiyan a li gundê Qestel Cindo yê navçeya Şera ya kantona Efrînê ya dagirkirî, hatin parvekirin.

Ev perestgeh sala 2018`an piştî dagirkirina Efrînê jî ji sedî 20 hatibû xirakirin.

Çavkaniyên ji hundirê Efrînê agahî dan ku çeteyên "Sultan Murad" ên girêdayî MÎT`ê peresgeh û gorên derdorê wêran kirine.

Perestgeh li ser rêya di navbera gundên Qitmê û Qestel Cindo yên navçeya Şera de ye û li gel êzidiyên cihekî girîng û mezin digire.

KOÇBERKIRINA ÊZIDIYAN

Girêdayî mijarê hevserokê Yekitiya Êzidiyên kantona Efrîn û Şehbayê Silêman Cafer ji ajansa me re axivî. Cafer got: "Hemû perestgeh û gorên me wêran kirin û ji bo temamkirina siyaseta guhartina demografîk, êzidiyên li Efrînê mane jî bi darê zorê didin koçberkirin."

Cafer bang li rêxistinên mafên mirovan kir ku destwerdanê bikin, vê hovîtiya li dijî Kurdan û bi taybet êzidiyan bi dawî bikin û ji bo bidawîkirina dagirkeriya Tirk li Efrînê û vegera koçberan alîkariyê bidin.

Cafer agahî da ku di nav de gundê Basûfanê, perestgehên êzidiyan ên li her devera Efrînê tên xirakirin.

Cafer bal kişand ser wêrankirina perestgeha Şêx Hemîd û wiha dewam kir: "Ev cara duyemîn e ev perestgeh tê wêrankirin. Armanca wan koçberkirina ji sedî 10`ê êzidiyên li Efrînê mane ye.”

SÛCÊN DIN…

Li Efrînê di 5 salên dagirkeriyê de gelek perestgehên êzidiyan hatin wêrankirin û kolandin; ji wan perestgeha Çiyayê Xanê ya li gundê Qîbarê, perestgeha Şêx Berekat a li gundê Şadêrê, perestgeha Şêx Xerîb li gundê Sînka, perestgeha Şêx Menan li gundê Kefir Cenê û gelek perestgeh û gorên din.

Ji wê zêdetir jî lixwekirina cilên "şerîî" li jinên êzidî tê ferzkirin, li gundên êzidiyan mizgeft hatine avakirin, dewreyên şerîetê ji zarokan re hatine vekirin û îslamiyet bi zorê li wan tê ferzkirin.

Di dawiya Adara 2023′yan de dîmeneke 2 welatiyên êzidî ku şêxên çeteyên dewleta Tirk a dagirker wan bi zorê dikin misliman hatibû parvekirin. Navên wan her du êzidiyan “Heyder Arif û Şêxo Arif” ên ji gundê Qîbarê bûn.

(fr)

ANHA