Ciwanan ji bo azadiya fîzîkî ya Rêber Ocalan meşiyan

Bi pêşengiya Tevgera Ciwanên Şoreşger a Sûriyeyê û Yekitiya Jinên Ciwan a Qamişloyê, bi sedan şêniyên Qamişloyo, di nav de endamên saziyên sivîl, TEV-DEM, PYD û Kongra Star daketin qadan û azadiya fîzîkî ya Rêber Abdullah Ocalan xwestin.

Meş ji pêşiya dermanxaneya Deham a taxa Kornîş dest pê kir. Di meşê de posterên Rêber Abdullah Ocalan, alên Tevgera Ciwanên Şoreşger a Sûriye, Yekitiya Jinên Ciwan, PKK, TEV-DEM û Kongra Star hatin hildan û pankartên bi nivîsên "Bi rihê Zap, Avaşîn û Metînayê em ê tecrîdê bişkînin û Kurdistana azad mîsoger bikin" û "Ciwan fedaî Rêber Ocalan in" hatin vekirin. Her wiha dirûşmên "Bê serok jiyan nabe" û "Bijî berxwedana gerîla" hatin berzkirin.

Meş li ber peykerê Karkeran a heman taxê veguherî mîtîngê. Li vir endama Desteya Ciwan û Werzîşê Besma Hesen Mehmûd daxuyanî xwend.

Di daxuyaniyê de hate bibîrxistin ku 24 sal e Rêber Abdullah Ocalan girtî ye û dewleta Tirk a dagirker tecrîdeke giran li ser wî ferz kiriye.

Di dewama daxuyaniyê de diyarkirin ku ji 23 mehan ve agahî ji Rêber Ocalan û girtiyên din ên li Îmraliyê nehatine wergirtin. Hate bibîrxistin ku hêzên navneteweyî li hemberî binpêkirinên li dijî Rêbertî û girtiyên din bêdeng in.

Di daxuyaniyê de hate gotin: "Têkoşîna ji bo azadiya fîzîkî ya Rêber Ocalan û avakirina Kurdistaneke azad wê dewam bike û geştir bibe."

(bb)

ANHA