Şehîd Argeş Tolhildan li Helebê hat bibîranîn

Meclisa Malbatên Şehîdan a Helebê ji bo gerîlayên HPGʹê Remedan Bedrî Hemkê (Argeş Tolhildan) yê ku di sala 2017ʹan de li Herêmên Parastinê yên Medyayê şehîd bûbû, konê sersaxiyê li qada Şehîdan a li beşa rojava ya taxa Şêxmeqsûdê veda.

Şênî, di nav de şaneyeke YPG, YPJ, Hêzên Ewlekariya Hundirîn, saziyên sivîl û partiyên siyasî herikîn bin konê sersaxiyê û merasîmeke hat li darxistin.

Merasîm bi torana leşkerî ya YPG û YPJʹê dest pê kir. Piştre  bi navê Meclisa Malbatên Şehîdan Amîna Xidro axivî.  Amîne Xidro berxwedana gerîla silav kir û got: "Gerîla li gorî xeta Rêber Abdullah Ocalan ji bo azadî û aştiyê tê dikoşin, lê dewletên emperyalîst bi hemû cûreyên çekên giran û yên qedexekirî êrişî vê berxwedanê dikin."

Amîne Xidro anî ziman ku gerîla wê bi ser bikeve û got: "Em bi hêzên xwe yên gerîla re ne. Em gav paşde neavêjin. Bi îrade û îsrara xwe em ê dijmin têk bibin, serkeftinê pêk bînin û azadiya fîzîkî ya Rêber Abdullah Ocalan mîsoger bikin."

Ji fermandarên YPGʹê Şervan  Efrîn jî got: "Şehîd Argeş tev li refên gerîla bû, bi salan têkoşîn kir heta ku tev li kerwanên nemiran bû. Em bi şehadeta wî serbilind in. "

Şervan Efrîn anî ziman ku şehîd Argeş mîna hevalên xwe yên gerîla li ser fikr û projeya Rêber Abdullah Ocalan meşiya, li hemberî zihniyeta dîktator sekinî û bi şehadeta xwe ji cîhanê re îsbat kir ku îrade û perwerdeya îdeolojî ji çekê bihêztir e.

Piştî axaftinan, endama Komîteya Perwerde û Fêrkirinê ya Civaka Demokratîk Zekiya Mistefa nasnameya şehîd xwend û radestî malbatê kir.

Merasîm bi dirûşmên "Şehîd namirin" bi dawî bû.

(bb)

ANHA