Li Minbicê semînerek li ser sûcên kuştina jinan hate dayîn

Nûnerên partiyên siyasî, endamên sazî û komîteyên jin li Minbicê tev li semînerê bûn. Sermîner li pirtûkxaneya Mihemed Menla Xizêl hate lidarxistin.

Di semînerê de 4 mijar hatin nîqaşkirin"Sedemên zêdebûna kuştina jinan bi behaneya parastina namûsê, çareseriyên wê, pîvanên giştî ku divê werin pêkanîn, rola desteyên qanûnsaz, rêveberî, dadwarî û saziyên civaka sivîl da ku cudahiya di navbera jin û mêr de bi dawî bibe."

Berpirsa Jinan a Partiya Hevbendiya Niştimanî ya Demokratîk li Sûriyê ya şaxê Minbicê Mûna El-Xelef got: "Ev sûc ji ber gelek sedeman têne kirin, ji wan sûcan serweriya rejîma baviksalar û desthilata mêr li ser jinan, tunebûna qanûnên ku van sûcan red dikin, tunebûna perwerdeya rast li ser esasê nirx û pîvanên exlaqî û mirovî, şerma jinan ku rastî urf û adatên civakî tên, tunebûna sîstemên parastinê ji bo jinan û paşguhkirina pêkanîna qanûn û cezayan."

'DIVÊ ZANEBÛN WERE BELAVKIRIN DA KU SÛC WERIN SEKINANDIN'

Têkildarî sekinandina vê diyardeyê Mûna ev tişt anî ziman: "Çareserî di şermezarkirina sûcên tundî û kuştina jinan de ye. Her wiha divê ev mijar ji aliyê saziyên qanûnsaz, rêveberî, dadwerî û saziyê civaka sivîl bi awayekî cidî were destgirtin."

Mûna bang li deste, meclis, sazî û şêniyan kir ku çanda zanebûnê belav bikin, doz û encamên neyînî û xeteriya vê diyardeyê û bandora wê li hevgirtin û avakirina civakî were şîrovekirin û got:" Divê saziyên jinan, çapemenî, akademisyen û kesên pispor ji bo hemleyeke civakî li dijî vê diyardeyê bixebitin."

Mûna behsa rola desteyên qanûnsaz, rêveber, dadwerî û saziyên civaka sivîl kir û ev tişt anî ziman: "Divê têkoşîn ji bo tunekirina qanûn, pîvan û rêgezên ku cudahiyê li dijî jinan ava dike, werin meşandin."

Di dawiyê de nîqaş di navbera kesên amade de hatin kirin û ev encamp hatin derxistin: "Divê dadgehên taybet ji bo dozên cudakariyê û dozên binpêkirina mafên mirovî yên jinan were avakirin. Têkoşîna ji bo avakirina saziyên fermî û ne fermî yên ku di bin sîwana qanûnê de kar dikin da ku jinan di aliyê qanûnê de biparêzin."

(bx)

ANHA

<iframe width="560" height="315" src="https://www.youtube.com/embed/a5KRTOoZhf0" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>