Meclisa PYD'ê ya navçeya Qenaya kongreya xwe ya 2'yemîn li dar xist

Kongre li Navenda Çand û Hunerê ya Baqî Xido ya Kobanê bi tevlêbûna bi dehan endamên Partiya Yekitiya Demokratîk (PYD) şaxê navçeya Qenaya li dar ket.

Di destpêka kongreyê de hevserokê PYD`ê Enwer Muslim rewşa siyasî nirxand.

Muslim destnîşan kir ku hemû civîn û kongereyên li derve yên bi armanca çareserkrina aloziya Sûriyê bê encam bû û got: " Ji Cinevê bigire ta Soçiyê tu civîn çareserî ji aloziya Sûriyê re bi xwe re neanî. Hikumeta Şamê hema hişmendiya xwe ya berê dimeşîne û hewl dide fitneyê di navbera pêkhateyên herêmê de derxe, lê gelê herêmê ji planên hikumeta Şamê hişyar e ku bi rêya wê dixwaze rewşa herêmê vegerîne beriya 2012`an."

Muslim diyar kir ku ruxmî ku di qada navneteweyî de Rêveberiya Xweser nehatiye naskirin, lê gelê herêmê wê nas dike, ji ber ku di warên birêxistinkirin û jiyana hevbeş de gelek destkeftî bi dest xistin û got, hemû jî dizanin ku Sûriyê wê venegere mîna berê, lê belê ber bi pergaleke demokratîk a nenavendî ve diçe.

Enwer Muslim têkildarî opozîsyona Sûriyê ya girêdayî dewleta Tirk destnîşan kir ku ew tenê komeke çeteyan e ku berjewendiyên dewleta Tirk li her derê bê xwestin, pêk tînin.

Girêdayî kar û xebatên PYD`ê Muslim got: “Divê endamên partiyê hewl bidin gel û rêveberiya wî bi giyaneke şoreşgerî pêş bixin. Wan ji bo pêvajoyên dijwartir re amade bikin bi şêwazekê ku serkeftina mayînde pêk were”.

Paşê hevserokê Nivîsgeha Têkiliyên Dîplomatîk a PYD`ê şaxê herêma Firatê Bekir Hec Îsa perspektîvên rêber Abdullah Ocalan ên der barê têgehên neteweya demokratîk û pênasekirina wê de xwendin.

Piştre endamê rêveber ê Meclisa PYD`ê ya navçeya Qenaya Mihemed Osman rapora rewşa siyasî xwend, bi navên Meclisa Malbatên Şehîdan endamê rêveber ê meclisê yê navçeya Qenaya Mihemed Ehmed, bi navê Kongreya Star a navçeya Qenaya endama rêveber a kongreyê Cenîna Mihemed axivîn û lidarketina kongreyê pîroz kir.

Piştî wê endama Meclisa PYD`ê Elya Bozê raporên rêxistinî yên meclisê û rapora Meclisa Jinan a Meclisa PYD`ê ya navçeya Qenaya xwend.

Di dawiyê de beşdaran raporên siyasî, raporên rêxistinî yên giştî, raporên rêxistinî yên jinan nirxandin. Her wiha bal kişandin ser êrişên dewleta Tirk a dagirker ku di vê dawiyê de zêde bûne û diyar kirin ku divê di vê pêvajoyê de yekitiya Kurd, hevgirtin di navbera pêkhateyên herêmê de pêk were û bi fitneyan nayên xapandin da ku pergala nenavendî ya demokratîk li Sûriyê pêk were û aloziya Sûriyê çareser bibe. Her wiha hate gotin ku divê bi giyaneke şoreşgerî xebat were meşandin, civakê û gel li ser bingeha azadî û jiyana hevbeş were bi rêxistinkirin.

Piştî wê beşdaran nêrîn û pêşniyarên xwe anîn ziman. Di dawiya kongreyê de endam û rêveberiyeke nû ya Meclisa PYD`ê ya navçeya Qenaya hatin hilbijartin.

(şx)

ANHA