Li herêmên Rêveberiya Xweser amadekariyên hilbijartinên herêmî didomin

Desteya Serokatiyê ya Meclisa Rêveber a Rêveberiya Xweser a Bakur û Rojhilatê Sûriyê duh bi endamên berê yên Komseriya Bilind a Hilbijartinan ên herêmên Cizîrê û Firatê re civiya. Armanc ji civînê ew e ku pisporiya Komseriya Hilbijartinan bigire da ku komseriyeke nû ava bike û amadekariyên hilbijartinên herêmî yên Rêveberiya Xweser a Bakur û Rojhilatê Sûriyê dewam bike.

Di civînê de endamên berê nêrînên xwe der barê hilbijartinan, mekanîzmaya birêxistinkirina wan di nava rewşên heyî li herêmê de, girîngtirîn mekanîzma û amadekariyên lojîstîkê de anîn ziman, da ku hilbijartin serkeftî werin lidarxistin. Her wiha piştrast kirin ku ji bo alîkarî û destekdayîna ji endamên nû re, amade ne.

Desteya Serokatiyê ya Meclisa Rêveber a Rêveberiya Xweser spasiya endamên komseriyê kir û bang li wan kir ku çawaniya amadekariyên hilbijartinên dema pêş, bişopînin.

Di encama kongreyên şêniyên herêmên Cizîr û Firatê de ku di 25`ê Mijdara 2020`an de hatin lidarxistin, pêwîst hate dîtin ku hilbijartinên herêmî pêk werin.

(bx)

ANHA