'Gefên dewleta Tirk tu bandorê li me nake'

Jinên rêveber ên Bakur û Rojhilatê Sûriyê piştrast kirin ku ruxmî gefên dewleta Tirk ên li dijî herêmê dê berxwedana xwe ji bo tunekirina terorê mezin bikin.

10 sibat, 2021 03:47

QAMIŞLO-KELSÛMA ELÎ

Bertek û nerazîbûnên gel li hemberî gefên dewleta Tirk ên li dijî herêmên Bakur û Rojhilatê Sûriyê zêde dibin. Endamên rêveber ên Yekitiya Jinên Ciwan gefên dewleta Tirk ên dagirkirina Dêrik û Şengalê şermezar kirin û piştrast kirin ku dewleta Tirk a dagirker tenê têkbirina destkeftiyên gelên herêmê armanc dike.

Ji rêveberên Yekitiya Jinên Ciwan a navçeya Çilaxa Sefa El-Ebdullah diyar kir ku dewleta Tirk siyaseta xwe ya ji bo tunekirina tecrubeya Rêveberiya Xweser a li herêmê, gefa dagirkirina Şengal û Dêrik li şêniyên herêmê dixwe. Sefa da xuyakirin ku pêkhateyên herêmê êdî baş komployên dewleta Tirk nas dikin û amade ne ji bo jiyaneke bi rûmet û azad, fedekariyan pêşkêş bikin.

Ji aliyê xwe ve endamê yekitiyê Nexem Mihemed got ku li hemberî gefên dewleta Tirk dê têkoşîn û berxwedana xwe mezin bikin.

Her wiha Endama Yekitiya Jinên Ciwan a Çilaxa Hediye Heyder îşaret pê kir ku dewleta Tirk ji êrişên xwe yên domdar li dijî herêmê armanc dike gelê Kurd û êzidiyên li Şengalê tune bike.

'SIYASETA DEWLETA TIRK DIYAR E'

Endama Meclisa Giştî ya Partiya Yekitiya Demokratîk (PYD) a navçeya Girkê Legê Rîm Idrîs wiha axivî: “Planên dewleta Tirk ne nû ne, ji dagirkirina Efrîn û Serêkaniyê ve destpê kirin, ranewestî û dê tevahiya herêmê dagir bike. Êdî siyaseta wê ji hemûyan ve diyar e. Ew siyaseteke çewisandinê dimeşîne ku jinan dikuje û gelan qir dike.”

Endama Meclisa Gel a navçeya Erîşe ya kantona Hesekê Buşra El-Hisên gefên dewleta Tirk ên li dijî herêmê şermezar kirin û wiha domand: “Dewleta Tirk dixwaze dîroka Osmaniyan a xwîndar vejîne. Wek gelê Bakur û Rojhilatê Sûriyê em nahêlin ku ew bigihêje armanca xwe û em dê hewl bidin tevahiya planên wê têk bibin.”

`TENÊ DIXWAZE PROJEYA NETEWEYA DEMOKRATÎK TUNE BIKE`

Endama PYD`ê Delal Hisên ev nirxand kir: “Dewleta Tirk dewleteke faşîst e û bi rêya êriş û gefên xwe yên li dijî herêmê dixwaze projeya neteweya demokratîk têk bibe, fitne û nakokiyan di navbera pêkhateyan de belav bike."

(şx)

ANHA