Meclisa navçeya Erîşe ji bo şermezarkirna êrişên li ser herêmê meşek li dar xist

Ji bo şermezarkirina sûcên çeteyên dewleta Tirk ên bi navê Artêşa Nîştimanî ya Sûriyê yên domdar li dijî herêmên Bakur û Rojhilatê Sûriyê û Şengalê, meclisa navçeya Erîşe meşek li dar xist.

Meşê ji ber avahiya Şaredariya Gel dest pê kir li qada Meclisa Sivîl a herêmê bi dawî bû û veguherî mîtîngê. Beşdaran alên Hêzên Sûriya Demokratîk (QSD), pankartên “Na ji dagirkeriya Osmaniya Nû re ya li ser bakurê Iraqê, Lîbya û Sûriyê” û wêneyên komkujiyên dagirkeriya Tirk a li dijî şêniyên Efrînê û zarokên wê hildan.

Di mîtîngê de bi navê Partiya Yekitiya Demokratîk (PYD) endamê rêveberiya nivîsgeha Şedadê Refet El-Derwîş axivî û got: “Dewleta Tirk li gel bêdengiya navneteweyî rojane êrişî herêmên Bakur û Rojhilatê Sûriyê dike, sûcên dermirovî pêk tîne û ewlehiya wê têk dibe.”

El-Derwîş diyar ki ku gelên herêmê û Şengalê yek in û dê li hemberî hewldanên dewleta Tirk û çeteyên wê ji bo dagirkirina wê yan jî radestkirina wê ji hikumeta Iraqê re, li ber xwe bidin.

Endama rêveberiya Kongreya Star a navçeya Erîşe Recaa El-Salih destnîşan kir ku berxwedana wan û berxwedana şehîdan mîna Hind El-Xidêr û Seîde El-Hermas û şehîdên azadiyê berdewam e û dê êrişên dewleta Tirk û çeteyên DAIŞ`ê vîna jinên azad neşikînin.

Meş bi berzkirina sloganên silavkirina berxwedana jinên azad û dilsoziya bi şehîdan re bi dawî bû.

(şx)

ANHA

<iframe width="560" height="315" src="https://www.youtube.com/embed/2FmlBrjfyLE" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>