Jinên Efrînê: Em ê li ber xwe bidin û xaka xwe rizgar bikin

Artêşa Tirk a dagirker û çeteyên wê di 23`yê vê mehê de li navçeya Til Rifetê ya kantona Şehbayê komkujiyek li dijî sivîlan pêk anî û di encamê de 4 kes şehîd bûbûn, jê jî jinek û du zarokan hebû.

Der barê vê yekê de şêniyên Efrînê yên li taxên Şêxmeqsûd û Eşrefiyê yên bajarê Helebê axivî û sûcên dewleta Tirk ên li dijî sivîlan şermezar kirin.

Şêniya bi navê Ewaş Mihemed axivî û wiha pirs kir: "Dewleta Tirk çi me dixwaze, ma komkujiyên ku li dijî Efrînê pêk anîn têrê nake ku li Şehbayê jî sûcan pêk tîne?"

ꞌZAROKÊN ME LI HEMBER DIJMIN MERTAL INꞌ

Şêniya bi navê Fîdan Tofan a ji Efrînê ku li bajarê Helebê dimîne got: "Dijmin nikare vîna gelê Kurd bişkîne, ji ber  ku şêniyên Efrînê mafdar in û dê zarokên wan li hember dijmin mertal bin.  Ji ber ku wan fikirê rêber Abdullah Ocalan ji xwe re kiriye bingeh û vî fikirî civakji bindestiyê rizgar kiriye."

Fîdan Tofan gotina wiha bi dawî kir: "Em Efrînê ji bîr nakin û nikarin ji bîr bikin jî. Ji ber ku êşek di dilên me de hiştiye û heta ji artêşa Tirk a dagirker û çeteyên wê rizgar nebe dê ji dilên me dernekeve. Ji lew re em ê berxwedana xwe berdewam bikin."

ꞌHETA VEGERÊ EM Ê LI BER XWE BIDINꞌ

Li aliyekî din jî Leyla Elî Ehmed axivî û îşaret bi êrişên dewleta Tirk ên li dijî koçberên Efrînê yên li kampan dimînin kir û wiha got: "Şêniyên Efrînê bi darê zorê ji malên xwe hatin derxistin û ji ber sûcên dewleta Tirk berê xwe da kampên koçberan ên li Şehbayê, lê dîsa jî artêşa Tirk a dagirker sivîlên ku xeta berxwedanê ji xwe re kirine bingeh, dike armanc û komkujiyan li dijî zarok û jinan pêk tîne."

Leyla Elî Ehmed wiha gotinên xwe dewam kirin: "Ev ne carê yekê ye ku dewleta Tirk êrişî bajarokê Til Rifetê dike, beriya niha jî di 2`yê Kanûna 2019`an de li dijî Til Rifetê komkujiyek pêk anî, di encamê de 8 kes ku piraniya wan zarok bûn şehîd bûbûn. Em vê komkujiyê ji bîr nakin. Niha jî wan komkujiyan dubare dike, 4 kes şehîd bûn û piraniya wan zarok û jin bûn."

Leyla Elî Ehmed di dawiyê de da zanîn ku şêniyên Efrînê xwediyê vîna azad in, erdê xwe ji dagîrkeran re nahêlin û dê heta vegera li Efrînê li ber xwe bidin.

(eh)

ANHA

<iframe width="560" height="315" src="https://www.youtube.com/embed/jEb0Nmpb0nU" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>