Şêniyên Hesekê sersaxî ji malbatên herdu şehîdên Til Şayir re xwestin

Meclisa kantona Hesekê bi dirûşmeya "Hûn ji bo şikandina îradeya me û têkbirina azadiya me, me dikin hedef, lê berxwedan û têkoşîn armanca me ye" konê sersaxiyê ji bo hevseroka meclisa bajarokê Til El-Şayir a girêdayî navçeya Şedadê Seida Feysel El-Hermas û cîgira wê Hind El-Xidêr ji aliyê çeteyên DAIŞ`ê ve, veda.

Konê sersaxiyê li qada Şehîd Arso ya li taxa El-Nasra ya bajarê Hesekê hatiye vedan. Bi bin kon de wêneyên şehîdan, ala QSD û Kongreya Star hatine daleqandin.

Bi dehan ji şêniyên kantona Hesekê, navçeyên wê, endamên saziyên sivîl û leşkerî, endamên PYD û Partiya Pêşerojê ya Sûriyê tev li konê sersaxiyê bûn.

Di bin konê sersaxiyê de Hevseroka Meclisa Kantona Hesekê Semer El-Abdullah wiha axivî: "Şehîd Seida El-Hermas û Hind El-Xidêr bi şêwazekî dermirovî ji aliyê terorîstan ve hatin qetilkirin."

Semer El-Abdullah destnîşan kir ku armanca ji kuştina her du jinan, xirabkirina aramî, ewlehî û jiyana hevbeş di navbera pêkhateyên herêmê de ye.

Semer El-Abdullah bang li hemû pêkhateyên herêmê kir ku di yek rêzê de li hember komployan bisekinin û destekê bidin QSD`ê.

Paşê bi navê Partiya Pêşerojê ya Sûryê Newroz Ebdo axaftin hate kirin û wiha hate gotin:" Rola jinê di avakirina civakan de sereke ye. Îro ji aliyê hêzên zulmkarî tê hedefgirtin û armanca vê yekê ku îradeya wê bişkîne. Em weke Partiya Pêşerojê ya Sûriyê tekez dikin ku em ê her tim şopdarên rêya şehîdên ku ji bo azadî û rûmeta gelên herêmê canê xwe feda kirine, bişopînin."

Bi navê PYD`ê ya bajarê Hesekê Abdullselam Hiso destnîşan kir ku armanca çeteyan ji şêwazên qirêj ku îradeya gelên Bakur û Rojhilatê Sûriyê bişkîne, ji ber şoreşa ku jin têde tine be şoreşeke kême û nikare pêş bikeve.

Konê sersaxiyê wê heta saetên êvarê didome.

(bx)

ANHA

<iframe width="560" height="315" src="https://www.youtube.com/embed/pSZhs8ZLChc" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>