Li Helebê tedbîrên xweparastina ji Koronavîrusê…Li Hesekê jî dest bi ziftkirina rêyan hate kirin

HESEKÊ

Şaredariya Gel a Hesekê meha Nîsana derbasbûyî ragihandibû ku ew ê rêyên bajêr zîft bike, lê ji ber pandemiya Koronavîrusê (Covid-19) qedexeya derketina derve hate ragihandin û proje hate paşxistin.

Beriya çend rojan Komîteya Jîngeh û Şaredariyan a Hesekê kolan û rêyên sereke yên bajêr zîft kirin.

Endamê Komîteya Çavdêriya Projeya Zîftkirinê ya Hesekê Fehed Îbrahîm diyar kir ku wan piraniya rêyên sereke yên bajar zîft kirine; rêya Menhel a bendava rojhilat, rêya nexweşxaneya Gel a li Ezîziyê û gelek rêyên din.

Fehed Îbrahîm wiha dawî li axaftina xwe anî: "Niha rêya taxa Miftî tê zîftkirin, ji ber ku bi salan e hatibû  paşguhkirin, gelek konçal lê çêbûne, erebe zehmetiya derbasbûnê dikişînin, nexasim di demsala zivistanê de."

HELEB

Bi armanca pêşîlêgirtina belavbûna Koronavîrusê û parastina paqijiya giştî, Şaredariya Gel a Şêxmeqsûdê û Eşrefiyê yên Helebê bi tevlêbûna endamên Partiya Yekitiya Demokratîk dest bi hemleya paqijkirinê kir.

Bi dehan endamên PYD`ê û karkerên paqijiyê yên Şaredariya Gel tev li hemleyê bûn.

Têkildarî mijarê endama PYD`ê Valantîna Ebdo axivî û da zanîn ku piştî belavbûna Koronavîrusê û li bajarê Helebê hejmara kesên bi vîrusê ketine zêde bû, her wiha da ku şêniyan têkildarî parastina paqijiya giştî hişyar bikin, li Şêxmeqsûd û Eşrefiyê dest bi hemleyê kirine.

(eh)

ANHA