Bi navê "şoreşa birçiyan" xwepêşandanên Lubnanê careke din vedigerin

Îro bi sedan xwepêşandêran rêyên sereke li kolana Sûriyê ku li navrasta herêmê ye û ji aliyekî ve bi El-Qube û ji aliyê din ve jî bi parêzgeha Ekar a Terabilusê ve girê dide, qut kirin. Her wiha cama banka El-Etîmad El-Kain a li Bolîvar El-Mîna şikand. Ji ber bilindbûna buha û lîstina bi buhayê dolaramn, li welêt xwepêşandan hene.

Li qada Abdulhemîd Keramî jî di navbera xwepêşandêr û artêşê de pevçûn derket û ji bo jihevkirina xwepêşandêran, endamên artêşê gule reşandin.

Duh êvarê, fermandariya artêşa Lubnanê bi daxuyaniyekê diyar kiribû ku hin kesan tevlîhevî derxist û destdirêjî li milkên taybet û giştî kir, her wiha hin şaxên bankan hatin şewitandin û li dijî yekîneyên artêşê yên belavbûbûn jî, çalakî hatin kirin. Li gorî daxuyaniyê, erebeyeke leşkerî bi bombeyeke molotof û dewriyeyeke din bi bombeyeke destan, hatin hedefgirtin û di encamê de 2 leşker bi sivikî birîndar bûn.

Fermandariya artêşê bang li welatî û xwepêşandêrên bêçek kir ku bi lez xwepêşandanan bi dawî bikin û qadan vala bikin. Her wiha hişyarî da ku dê li dijî kesên ewlehiyê têk dibin, tedbîrên hişk bigirin.

Di heman der barê de, tora El-Erebiyê Net da zanîn ku welatiyê Lubnanê Fewaz El-Seman (26) di pevçûnên duh ên di navbera xwepêşandêr û artêşê de hat kuştin û 39 sivîl û leşkerên din jî birîndar bûn.

(cx)

ANHA