Ralph Abraham ji bo Reqayê çi got?

Ralph Abraham serdana Bakur û Rojhilatê kir û bi fermandarê giştî yê QSD`ê, Rêveberiya Xweser û Meclisa Sivîl a Reqayê re hevdîtin pêk anîn.

Ralph Abraham piştî ku serdana Meclisa Sivîl a Reqayê kir, ji ajansa me re axivî û ev tişt got: "Ez hatim Reqayê û tiştên gewre û mezin ên ku çêbûne min dîtin. Ez bi pirbûna şêniyên wê kêfxweş im. Ji min re hate gotin ku beriya niha ev hejmara pir a şêniyan tune bû. Tiştê ku herî zêde ez pê kêfxweş bûm, dîtina min a zarokan bû ku dema dilîstin. Her wiha min werşeyên kar dîtin û di rêya xwe de min xebata jinûveavakirinê jî dît. Ez ê vê nameyê bi xwe re bibim DYA`yê."

Abraham di berdewama axaftina xwe de bal kişand ser rewşa Kurdan û got: "Me li Amerîkayê têkoşîna Kurdên Sûriyê dît û dema ez li vir bûm ez bûm şahidê vê têkoşînê. Têkildarî vê mijarê, ez ê endamên din ên kongreyê bînim vir da ku bi çavê xwe tiştên ku li serê Kurdên Sûriyê tê, bibînin."

Hevserokê Komîteya Kar û Barên Civakî Ebd El-Selam Hemsorik jî got nîqaşa di navbera wan û şandeya amerîkî de çêbûye, erênî bû û wiha domand: "Serdan erênî bû û sozên mezin ji aliyê endamê Kongreya Amerîkayê Ralph Abraham ve ji bo dewamkirina destekdayîna bi QSD û Rêveberiya Xweser li herêmên Bakurê Sûriyê re, hatin dayîn. Me rewş bi awayekî giştî ji wî re û nexasim binpêkirinên dewleta Tirk li ser herêmên Bakurê Sûriyê şîrove kir."

Hemsorik anî ziman ku Ralph Abraham gereke dirêj li bajarê Reqayê kir û bi pêşketin û serkeftinên ku piştî xerabûna ku çeteyên DAIŞ`ê li pey xwe hiştibû, kêfxweş bû.

Hemsorik bi domdarî got: "Me behsa pêla koçberiyê ya mezin li herêmên Bakurê Sûriyê ji ber dagirkirina dewleta Tirk û nexasim ji bajarê Idlibê kir. Her wiha me got bajarê Reqayê şêniyên ji hemû neteweyan dihewîne û ji herêmên ku herî zêde lê îstiqrar û ewlehî heye. Ev jî nimûneya Sûriyeke biçûk ji Kurd, Ereb, Ermen, Çerkes û neteweyên din e."

(kc)

ANHA

<iframe width="560" height="315" src="https://www.youtube.com/embed/SZmsv2wX_Vs" frameborder="0" allow="accelerometer; autoplay; encrypted-media; gyroscope; picture-in-picture" allowfullscreen></iframe>