Hejmara koçberên li kampa Waşokanî zêde dibin, rêxistinên mirovî bi karê xwe ranabin

Hejmara koçberan li kampa Waşokanî gihaştiye 6 hezar û 200‘î. Koçber di nava şert û mercên zehmet de dijîn di demekê de ku rêxistinên navdewletî erkên xwe bi cih naynin.

4 ÇILE, 2020 14:54

HESEKÊ

Di encama êrişên Tirkiyê yên li ser herêmên Bakur û Rojhilatê Sûriyê ku heta niha didome 300 hezar sivîl hatin koçberkirin.

Rêveberiya Xweser a Bakur û Rojhilatê Sûriyê li bajarê Hesekê 64 navend ji bo koçberan vekirin û li bajarokê Tiwêna yê 12 km dikeve rojavayê bajêr kampa Waşokanî vekir.

Koçberên di kampê de di şert û mercên zehmet de dijîn di demekê de ku ji bilî Rêveberiya Xweser û Heyva Sor ti rêxistinên navdewletî bi karê xwe ranabin.

Hejmara wan ku berê 5 hezar û 700 bûn niha derket 6 hezar û 200, anku hezar û 100 malbat. Her malbatek di çadirekê de dimîne.

Rêveberê kampê Hesen Yûsif diyar kir ku hîna gelek malbat di kampa pêşwazîkirinê de ne û qeydkirina rawestiyaye, ji ber ku xebatên sererastkirina kampê di encamên rewşa hewaya de dereng dimeşe.

Rêveberê kampê û Rêxistina Heyva Sûr a Kurd heman hezar û 200 pakêtên xwarinê û 100 pakêtên tenduristiyê tevlî sobe û betanî û gaz pêşkêşî koçberan kirine.

Rêveberê kampa Waşokanî Hesen Yûsif bang li rêxistinên navdewletî kirin ku alîkariyan ji koçberan re bişînin.

ANHA