Li Girkê Legê merasîma sersaxiya şehîdên Berxwedana Rûmetê

Şêniyên navçeyên Girkê Legê, Çilaxa û Til Koçerê sersaxî ji malbatên 6 şehîdên Berxwedana Rûmetê şehîd bûbûn xwestin.

15 cotmeh, 2019 16:53

QAMIŞLO

Bi sedan şênî û şervan serdana konê sersaxiyê li navçeya Girkê Legê kirin ji bo ku sersaxî ji malbatên şehîdan re bixwazin.

Navên şehîdan wiha ne: Tîrêz Rojhilat bi rastnav Bobî Tabî, Şiyar Zagros bi rastnav Abdullah El-Iwêd, Dilgeş Dozhat bi rastnav Mihemed Korman, Dilşêr Qamişlo bi rastnav Muhend El-Hasûd, endamê Hêzên Ewlekariya Hundirîn Şivan Elîko û şehîd dayîka Aqîde Osman a ku li Serêkaniyê di encama bomebebarana balafirên dewleta Tirk a dagirker de şehîd bûye.

Di merasîma sersaxiyê de hevserokê meclisa navçeya Girkê Legê Mihemed Cemîl axivî û diyar kir ku wê gelên herêmê tevahiya komployên navdewletî û herêmî bi saya fedekariyên ciwan û gelê berxwedêr û têkoşer vala derxînin. Her wiha sersaxî ji malbata şehîd Dayîka Aqîde Osman a ku jiyana xwe ji bo welatê xwe feda kir xwest.

Ji aliyê xwe ve fermedarên YPJ`ê Nûcan Xêrkî axivî û got: "Li gel êrîş û komployên ku gel û axa me dikin hedef, divê em çek û fikrê xwe bikin yek û hêzên dagirkeriyê bişkînin."

(şx)

ANHA