Du bira ji destpêka aloziya Sûriyê ve winda ne

 Du bira, Mehmûd Hebeş û Idrîs Hebeş ji destpêka aloziya Sûriyê ve winda bûne û heta niha ti agahî ji wan nehatiye girtin.

Mehmûd Hebeş ê 46 salî ji gundê Quda yê herêma Raco ya kantona Efrînê ye û li taxa Benî Zeyd a Helebî mezin bûye. Ji sala 2011’an ve, di destpêka êrîşên li ser qereqola rêjîma Sûriyê ya li taxa Eşrefiyê ya Helebê de, Mehmûd ji malê derdikeve û ji wê demê ve malbat lê digere lê heta niha ti agahî jê nehatiye girtin.

Birayê Mehmûd, Idrîs Hebeş ê 44 salî jî bavê 3 zarokan e. Idrîs di sala 2013‘an de dema ji kar vedigere malê ji aliyê çeteyên "Lîwa Şuheda Bedir" ve tê girtin û ji wê demê ve nayê zanîn bê sax e an jî mirî ye.

Dayika Mehmûd û Idrîs, Zeyneb Seydo ji ajansa me re qala bûyera windabûna kurên xwe kir û wiha got: “Di sala 2011‘an de di qereqola taxa Eşrefiyê şer derket, di heman rojê de Mehmûd ji malê derket û venegeriya. Me li her cihê lê geriya lê heta niha me ti agahî li ser wî negirtiye. Di sala 2013‘an de jî çeteyên Lîwa Şuheda Bedir ên girêdayî Xalid El-Heyanî taxên Benî Zeyd, Eşrefiyê û hin taxên din ên Helebê kontrol dikirin. Idrîs li derve dixebitî da ku qûtê zarokên xwe peyda bike. Lê dema vedigeriya malê, çeteyên Xalid El-Heyanî li taxa Benî Zeyd ew girtin. Heta niha ez nizanim bê kurên min sax in an jî mirî ne. Ne bi şev û ne bi roj ez xew nakim. Ez hertim wan difikirim. Ez ji xweda re dûa dikin ku agahiyeke xweş li ser wan bibhîzim. Dûa dikim ku sax bin."

(jo/bm)

ANHA