Toreya kanalîzasyonê ya Tebqayê tê nûkirin

Şaredariya Gel a Tebqayê dest bi qonaxa duyemîn a sererastkirina toreya kanalîzasyonê ya bajêr kir. Li gorî rayedarên şaredariyê dê xebatên xwe di van sê mehan de bi dawî bikin û dê 5 km ji boriyên toreyê biguherînin.

NÛÇE

14 tebax, 2018 10:17

TEBQA

Şaredariya Gel a bajarê Tebqayê qonaxa duyemîn a sererastkirina toreya kanalîzasyonê dest pê kir, ku di encama hovîtiya çeteyên DAIŞ'ê de % 20 ji giştî toreyê hatiye hilweşandin.

Di qonaxa duyemîn de xebatên sererastkirinê dê li kolana sereke ya navenda bajêr û gelek deverên herdu taxên Duyemîn û Sêyemîn û taxa El-Meqasim ên beşê rojavayê bajêr dê bêne meşandin.

Rayedarên şaredariyê ragihandin ku dê 2.5 km ji boriyên toreya kanalîzasyonê ji giştî 5 km boriyên ku divê bêne guhertin, di van rojan de biguherîne.

Endamê rêveberiya Buroya Pîşeyî ya girêdayî Şaredariya Gel a Tebqayê Ebdilhemîd El-Ebdolî diyar kir ku di destpêkê de dê xebatên xwe li deverên herî zêde ziyan dîtine bidin meşandin, nemaze deverên ku niştecîbûna welatiyan têde zêde ye û piştrast kir ku projeya wan dê di sê mehan de bi encam bibe.

Di qonaxa yekemîn a sererastkirina kanalîzasyonê de toreya taxên Fayiz Mensûr, kolana Umer Bin Xetab û kolana El-Cahiz ên rojhilatê bajêr hatin sererastkirin.

ANHA