Binpêkirinên dagirkeriya Tirk li dijî gelê Efrînê têne belgekirin

Meclîsên Kantonên Efrîn û Şehbayê dest bi belgekirina binpêkirinên dagiorkeriya Tirk ên li dijî gelê Efrînê kirin. Dê ev belge pêşkêşî rêxistinên navneteweyî û hiqûqî bêne kirin.

11 gulan, 2018 14:44

SOLÎN REŞÎD-CERER CEFO/ŞEHBA

Derbarê mijarê de, Berdevkê Fermî yê Meclîsa Til Qirah a Kantona Şehbayê Heyder Reşîd ku beşdarî xebatên belgekirinê bûye, ji ANHA′yê re axivî.

Heyder Reşîd da zanîn ku civaka navneteweyî ya li hember hovîtiya dagirkeriya Tirk a li dijî gelê Efrînê bêdeng ma, berpirsa hemû kiryarên hovane yên li dijî gelê Efrînê ye.

Heyder destnîşan kir ku meclîsên Şehba û Efrînê dest bi xebatên belgekirina binpêkirinên artêşa Tirk a dagirker û çeteyên wê kirin û got ku dê ev belge pêşkêşî rêxistinên navneteweyî bên kirin, da kiryarên dagirkeriya Tirk sînordar bikin.

Heyder diyar kir ku ew ê di çarçoveya xebatên belgekirinê de, serdana hemû gelê Efrînê yên bi darê zorê ji malên xwe hatine destxistin bikin û hemû kiryarên li dijî gelê sivîl belge bikin.

Artêşa Tirk a dagirker 20′ê Çile dest bi êrîşên hovane yên li dijî Kantona Efrînê kir. Di encamê de bi sedan şehîd û bi hezaran birîndarên sivîl çêbûn. Her wiha ziyaneke mezin gihîşt binesaziya kantonê û bi hezaran gel ji malên xwe hatin koçberkirin.

(mm)

ANHA