Mîrateya 11`ê Îlonê û zextên li ser Îsraîlê li herêmê rojeva medyaya Erebî bû

Îro, medyaya Erebî du mijarên sereke xistin rojevê, ya yekem, nirxandinek li ser bandora êrişên 11ê Îlona 2001an piştî 25 salan, û ya duyem, guhertinên ku li herêmê diqewimin, bi taybetî zexta li ser Îsraîlê û bandorên pevçûna herêmî li Rojhilata Navîn.

Rojnameya El Nehar li ser salvegera 25`emîn a êrişên 11ê Îlonê nivîsî, û di gotarek bi sernavê "Çaryek Sedsal Piştî 11ê Îlonê: Ji El Qaîdeyê Berbi Terorîzma Nenavendî", li ser guhertinên ku ji êrişên 11ê Îlonê vir ve li ser nexşeya "terorîzmê" ya cîhanî çêbûne, nîqaş kir û destnîşan kir ku xetere bi tevahî kêmtir bûye, lê bêtir belav bûye û şopandina wê dijwartir bûye.

Rojnameyê diyar kir ku li gorî qonaxên berê hêza komên cîhadîst kêm bûye, di heman demê de qebûl kir ku ew dikarin bi rêya tor, şax û komên cuda kar bikin û beşek ji navenda giraniya cîhadîst ber bi herêmên nû ve, bi taybetî li Afrîkayê, veguhezîne.

Rojnameya El Quds El Erabî, di gotarek bi sernavê "25 Sal Ji 11ê Îlonê Ve: Derewên 'Şerê li dijî Terorê'", encamên polîtîkayên ku Dewletên Yekbûyî yên Amerîkayê piştî êrişan pejirandine, rexne kir, û rexne li veguherîna şerê li dijî "terorîzmê" bo hincetek ji bo şer û destwerdanên leşkerî û ewlehiyê kir.

VEGUHERÎNÊN HERÊMÎ Û ROLA ÎSRAÎL, ÎRAN Û HÊZÊN WAN ÊN PÊWENDÎDAR

Rojnameya El Nehar gotarek bi sernavê "Şemaqek Xurt ji bo Îsraîlê ji Welatên Rojava" weşand, ku tê de guhertina helwesta Brîtanî û Rojavayî ya li hember Îsraîlê nirixand. rojnameyê destnîşan kir ku "tiştê ku balkêş e guhertina Brîtanyayê ya ji bo piştgiriya mafên gelê Filistînê ye," û nirxand ku guhertina Rojavayî dibe ku zextek zêde li ser Îsraîlê pêk bîne.

Di gotareke din de bi sernavê "Kontrola Mutleq a li ser Cebel El Şêx... Netanyahu Bihayê Peymana bi Şamê re Bilind Dike", rojnameyê bal kişand ser rêça têkiliya di navbera Îsraîl û Şamê de û guhertina helwesta Îsraîlê li ser hebûna leşkerî li Cebel El Şêx û nîşan da ku Îsraîl ji "hebûneke demkî" ber bi "hebûna ewlehiyê" ve çûye û wê bi şertên her peymana ewlehiyê bi Şamê re girêdide.

(k)

ANHA