Konferansa Meclisa Jinan a Meclisa Malbatên Şehîdan tê lidarxistin

Konferansa 3’yemîn a Meclisa Jinan a Meclisa Malbatên Şehîdan li bajarokê Rimêlanê tê lidarxistin.

JIN

25 cotmeh, 2025 12:28

QAMIŞLO

Konferansa Meclisa Jinan a Meclisa Malbatên Şehîdan a 3’yemîn a bi dirûşma “Bi rihê şehîdên azadiyê, demokrasî û aştiyê mayînde bikin û azadiya fîzîkî ya Rêber Apo mîsoger bikin” dest pê kir. Konferans li hola Navenda Çand û Hunerê ya Aram Tîgran a bajarokê Rimêlanê yê kantona Cizîrê bi beşdariya nêzî 400 delegeyên ji herêmên cuda yên Bakur û Rojhilatê Sûriyeyê tê lidarxistin.

Konferansê bi rêzgirtinê dest pê kir. Piştre bi navê Meclisa Malbatên Şehîdan Sureya Hemû, bi navê Kongra Star Gulistan Gulo û bi navê YPJ’ê fermandar Kurdistan Koçer axivîn. Di axaftinan de îşaret bi rola pêşeng a jinan a di domandina rêya şehîdan, belavkirina nirxên azadî û wekheviyê de hat kirin. Her wiha behsa keda şehîdan di parastina herêmê û têkbirina terorê de hat kirin.

Endama Kongra Star Elîf Hemo jî rewşa siyasî ya li Sûriyeyê û guhertinên li herêma Rojhilata Navîn şîrove kirin.

Di konferansê de dê rapora xebatên 2 salên borî yên meclisê were xwendin, rêzikname were xwendin û nîqaşkirin. Her wiha dê endamên nû yên meclisê werin hilbijartin.

(bb)

ANHA