‘Heta azadiya Rêber Abdullah Ocalan têkoşîna me jinan dê bidome’

Bi nêzîkbûna 26’emîn salvegera Komploya Navneteweyî ya li ser Rêber Abdullah Ocalan re, li herêmên Bakur û Rojhilatê Sûriyeyê rêzeçalakiyên berfireh ji bo şermezarkirina sîstema îşkence û qirkirinê ya li Îmraliyê têne lidarxistin. Bi vê boneyê îro jinên li bajar û bajarokên herêmê tev li meşa girseyî ya li Qamişloyê bûn. 

Zehra Emîn a ji Til Temirê destnîşan kir ku Rêber Abdullah Ocalan bi fikir û felsefeya xwe rêya azadiyê li pêşiya hemû gelên herêmê vekir û got: "Em wek jinên Bakur û Rojhilatê Sûriyeyê bi biryar in ku têkoşînê geş bikin û tev li çalakiyên girseyî bibin."

Eva El Hesen jî anî ziman ku jinên Til Temirê wekî hemû jinên herêmê dê qadên têkoşînê bernedin û wiha got: "Heta azadiya fîzîkî ya Rêber Abdullah Ocalan bi dest bixin, em ê berxwedanê bidomînin, ji ber ku yê ku zincîr şikand û rêya azadiyê ji me re vekir, ew e.”

Dilber Şemo ya ji bajarê Dirbêsiyê jî got bi hevgirtina gel dê sîstema îşkence û qirkirinê bi dawî bikin.

Endama Kongra Star a bajarê Şedadê Umeya Hecûb ku bi karwanê jinan re ber bi Qamişloyê ve bi rê ketibû jî destnîşan kir ku polîtîkayên îşkence û qirkirinê yên dewleta Tirk a dagirker ên li dijî Rêber Abdullah Ocalan û desteserkirina mafên wî yên bingehîn, binpêkirineke aşkera ye û got: "Rêbertî ne tenê banga azadiya gelê xwe kir, lê her wiha ji bo azadiya jinan tê koşiya. Ji ber weê jî em ê ji bo rakirina sîstema işkence û qirkirinê têkoşîna xwe bidomînin.”

Her wiha endama Kongra Star Welada Mihemed a ji bajarê Şedadê jî diyar kir ku tevlêbûna meşê tê wê wateyê ku felsefeya Rêber Abdullah Ocalan ji bo gelên Bakur û Rojhilatê Sûriyeyê bûye ronahî.

(k)

 Tel Temir

Dirbêsiyê 

Şedadê