′Li hemberî êrişên dewleta Tirk em ê berxwedanê xurttir bikin′

Navenda Ragihandinê ya Meclisa Leşkerî ya Minbicê ragihandibû ku artêşa Tirk a dagirker û çeteyên wê di Cotmeha borî de 65 caran bi top û hewanan êrişî gundewarên Minbicê kiriye û dabû zanîn: "Dewleta Tirk a dagirker û çeteyên wê gundên Ewn Dadat, Eseliyê, Farat, Kawkilî, Bûzkînc, Diyabat, Ereb, Hesen, Muhsenlî, Masî, Seyada û Dendeniyê yên rojavayê bajêr topbaran kirin."

Ji Minbicê ji pêkhatiya Kurd welatiya bi navê Şemse Berkel êrişên dewleta Tirk şermezar kirin û wiha got: "Armanca êrişên dewleta Tirk ên li ser Bakur û Rojhilatê Sûriyê ew e ku xerabî û aloziyê di nava gel de belav bike. Dewleta Tirk hewl dide mozaîka civakî têk bibe û fitneyê derxe."

Şemse Berkel diyar kir ku divê gel bi hev re li dijî êrişên dewleta Tirk bisekinin û ev yek bi rêya zanakirin, birêxistinkirina gel û perwerdekirina li ser bingeh û prensîbên şerê gel ê şoreşgerî pêk tê û wiha domand: "Bilindkirina asta têkoşîn û berxwedanê li ser milê şênî û jinan e da ku li hember êrişên dewleta Tirk a dagirker bisekinin, bersivê bidin û têk bibin."

Welatiya ji pêkhateya Ereb Heyat Salim jî got: “Di radeya yekemîn de dagirkeriya Tirk jinan dike hedef, ji ber ku ji têkoşîn û destkeftiyên wê yên li herêmê pêk anîne, ditirse."

Heyat Salim wiha pê de çû: "Dewleta Tirk di êrişên xwe yên li ser herêmê de hemû çekên giran û yên qedexekirî bi kar tîne, nîşaneya vê yekê hedefgirtina gerîla li Başûrê Kurdistanê bi çekên kîmyewî ye ku di encamê de 17 gerîla şehîd bûbûn."

Heyatê ev tişt anî ziman: "Em jin, helwesta me ji êrişên dewleta Tirk ên li dijî herêmê tund e û em ê têkoşîna bilindtir bikin. Her wiha peyama xwe bigihînin dijmin ku jin dikarin bi rola xwe ya aktîf di şerê li dijî wê de rabin."

Ji pêkhateya Çerkes jî Talîn Diyaedîn êrişên dagirkeriya Tirk şermezar kirin û wiha got: "Armanca dagirkeriya Tirk ew e ku tirsê bixe nava şêniyan, ewlehî û îstîqrara li herêmê tevlihev bike."

Talîn bal kişand ser pêdiviya biçekkirina jinan û axaftina xwe wiha bi dawî kir: "Rejîmên desthilatdar vîna jinan dikin hedef. Ji lew re divê jin xwe perwerde û bi rêxistin bikin da ku li hemberî van rejîman derkevin."

ANHA