Jinên Dêrazorê amadekariyên pêşwazîkirina cejna Qurbanê dikin

Cejna Qurbanê bi rêûresmên taybet ên ku ji civak û olê hatine wergirtin, tê naskirin. Di vê cejnê de dehî (Qurbanî) tê serjêkirin û goşt û şêranî têne belavkirin.

Her sal bi hatina cejnê re jinên Dêrazorê cûreyên cûda ji şêraniyan amade dikin û li hev kom dibin û di çêkirina wan de alîkariya hev dikin.

Têkildarî pêşwazîkirina cejnê welatiya bi navê Hemda El-Casim ku ji gundewarên rojhilatê Dêrazorê ye ji ANHA`yê re wiha got: "Em cejnê bi cûreyên cûda ji çêkirina şêraniyan pêşwazî dikin. Em şêraniyên xwe li malê çêdikin. Ji ber bi awayekî paqij şêranî tê çêkirin."

Girêdayî amadekariyên cejnê Hemda El-Casim ev tişt anî ziman: "Em cûreyên cûda ji şêraniyan li malê bi alîkar û hevkariya xizim û cîranan, çêdikin."

Hemda diyar kir ku piştî ew çêkirina şêraniyan bidawî dikin, berê xwe didin sûkan da ku pêwîstiyên cejnê û cilan ji zarokên xwe re bikirin.

Hemda El-Casim di dawiyê de got ji girîngtirîn rêûresmên cejnê serdana goran di roja cejnê de ye û li wir şêranî tê belavkirin.

Girêdayî heman mijarê, Delal El-Ehmed têkildarî pêşwazîkirina cejnê got : "Em wekî jin cejna Qurbanê bi amadekirina şêraniya cejnê, kirîna diyariyan, serdana xizm û hevalan pêşwazî dikin."

Delal El-Ehmed kêfxweşiya xwe bi hatina cejna Qurbanê re eşkere kir û wiha dawî li axaftina xwe anî: "Tevî hemû rewşên ku herêmên me têre derbas dibin, em cejna Qurbanê bi kêfxweşî pêşwazî dikin. Em hêvîdar in ku cejna Quranê bibe rojeke xêrê û ewlehî û aramî li ser tevahî şêniyên Bakur û Rojhilatê Sûriyê."

(bx)

ANHA