Karkerên paqijiyê ji bo pêşîlêgirtina belavbûna Koronayê di nava serferberiyê de ne

Ji dema li herêmên Bakur û Rojhilatê Sûriyê Koronavîrus belav bûye de , çavên her kesî li kadroyên tenduristî û ewlehiyê ne ji ber li dijî vîrusê kar û xebateke bêhempa dikin, lê belê hin hene ku parastina herêmê dikin û parastina sivîlan ji xeteriya pêketina vîrusê dikin.

Li herêmên Bakur û Rojhilatê Sûriyê tevî ku Rêveberiya Xweser tedbîrên xweparastina ji vîrusê girtine, lê dîsa jî belav bûye û hejmara kesên pê dikevin zêde dibe. Şaredariyên gel ên li tevahiya herêman bi hemû enerjiya xwe kar û xebatê dikin û xwedî li parastina welatiyan derdikevin.

Şaredariyan li herêm, navçe, bajarok û bajarên mezin heta li kampan jî hemleyên  dezenfektekirinê dane destpêkirin.

Cîgirê hevserokatiya Şaredariya Gel ê navçeya Fafîn a kantona Şehbayê Idrîs Şêxo axivî û got ji destpêka Koronavîrus li herêmê berbelav bûye de, wan bi hevkariya meclisên navçeyê û komînan li kantonê dest bi hemleyên dezenfektekirinê kirine, parastina welatiyan dikin û pêşî li belavbûna vîrusê digirin.

Karkerên paqijiyê ji bo parastina selametiya welatiyên li herêmê karekî bêhempa dikin, ji ber di demeke wiha de barekî mezin dikeve ser milên wan û divê parastina gel ji Koronavîrusê bikin.

Ji saetên sibê  û heta êvarê de karkerên paqijiyê herêmê dezenfekte dikin, lewma ew kesên herî zêde bi xeteriya vîrusê re rû bi rû ne, lê dîsa jî bi erka xwe radibin û bajarê xwe paqij dikin.

Karkerê paqijiyê yê Fafînê Mihemed Hemo axivî û diyar kir ku ew saet ji 6:00 sibê û heta êvarê de kar dikin, kolanên sereke û neserek paqij dikin, ji ber bi belavbûna Koronavîrusê re erka parastina welatiyan ji wan tê xwestin.

Mihemed Hemo bal kişand ser çawaniya parastina kesayetî û wiha domand: "Di dema kar de em nahêlin kombûn çêbe, ji hev û din dûr dikevin, domdar lepik û maskan li xwe dikin û xwe dezenfekte dikin."

Karker Cîhad Mihemed jî axivî û da zanîn ku ew ji bo parastina welatiyan û pêşî li belavbûna Koronavîursê bigirin her tim kar dikin.

Mihemed bang li welatiyan kir ku bi karkeran re alîkar bin û çopê bavêjin cihên diyarkirî.

(eh)

ANHA