Di dema qedexeya derketinê de xwendekarên Minbicê perwerdeya xwe ji dûr ve dibînin

Di çarçoveya tedbîrên xweparastinê de ku Rêveberiya Sivîl a Demokartîk ji bo pêşîlêgirtina belavbûna Koronavîrusê (Covid-19) girtine, li bajarê Minbicê û gundewarên wê qedexeya derketina derve heye. Ji roja destpêkê ya pêkanîna biryara qedexeyê ve Komîteya Xwendin û Perwerdeyê bi rêya malpera xwe ya fermî li ser tora civakî û kanala Minbicê, dîmenên qeydkirî yên waneyan belav kirin.

Hevserokê Komîteya Xwendin û Perwerdeyê ya Minbicê Suhêl Walî, wiha ji ANHA`yê re got: "Waneyên ku bi rêya kanala Minbicê û malpera fermî ya komîteyê li ser tora civakî tên dayîn, ji bo xwendekarên asta navîn û amadehî ne."

Walî wiha domand: "Bernameya waneyan li gorî bernameya perwerdeyê ya sala xwendinê ye û li gorî dema mayîna li malê ye. Mamosteyên pispor çavdêriya perwerdekirina ji dûr ve dikin."

Suhêl Walî destnîşan kir ku Komîteya Xwendin û Perwerdeyê çavdêriya kontrolkirina waneyan dike û diyar kir ku armanc ji sîstema perwerdeya ji dûr ve ew e ku waneyên ku xwendekaran di dema dûrketina ji dibistanên xwe nestandine, bên dayîn."

Her wiha îşaret pê kir ku bernameya perwerdekirina ji dûr ve hat dayîn ji ber ku mamoste û xwendekar li malê ne û ev plana perwerdeyê kedeke mezin û zanabûna teknîkî ji mamosteyan dixwaze.

Walî bang li hemû mamosteyên pispor kir ku piştgiriyê bidin vê plana perwerdeyê û hevkariya Komîteya Xwendin û Perwerdeyê bikin da ku xwendekar bikarin perwerdeya xwe dewam bikin. Her wiha bang li malbatên xwendekaran kirin ku perwerdeya zarokên xwe bişopînin, nexasim ku dema ezmûnan nêzîk bûye û serkeftin ji hemû xwendekaran re xwest.

Ta niha ji bo perwerdekirina xwendekarên asta seretayî bi heman rengî, tu planên Komîteya Xwendin û Perwerdeyê tune ne.

Hêjayî bibîrxistinê ye ku sîstema perwerdekirina ji dûr ve, tecrûbeyeke nû ya Komîteya Xwendin û Perwerdeyê ye û ji bo şert û mercên qonaxa heyî û parastina berdewamkirina xebatên perwerdeyê di hemû mercan de, hat danîn.

(cx)

ANHA