'Tenê gerîla li dijî projeya dagirkeriya Tirk eʹ

Der barê êrişên artêşa Tirk a dagirker ên li dijî Başûrê Kurdistanê de, şêniyên Kurd destnîşan kir ku gerîlayên Hêzên Parastina Gel (HPG) parêzvanên gelên Kurdistanê ne û rê li ber projeyên qirkirinê yên dewleta Tirk a dagirker û hevkarên wê yên li Başûrê Kurdistanê digirin.

Li seranserî Başûrê Kurdistanê êrişên artêşa Tirk a dagirker bi hevkariya Partiya Demokrat  a Kurdistanê (PDK) zêdetir dibin. Di êrişan de hemû cûreyên çekan û yên qedexekirî tên bikaranîn. Li hemberî van êrişan gerîla bi tena xwe li ber xwe didin.

Welatiyê bi navê Siyamend Îbrahîm ê ji bajarê Tirbespiyê ya Herêma Bakur û Rojhilatê Sûriyeyê piştgiriya xwe ji gerîlayan re nîşan da û diyar kir ku siyaseta dewleta Tirk a dagirker a ku li ser bingeha qirkirina gelan rabûye heta îro didome û got: "Ev yek di êrişên li dijî Başûrê Kurdistanê, Herêma Bakur û Rojhilatê Sûriyeyê de xuya dibe."

Îbrahîm diyar kir ku dewleta Tirk a dagirker nikare îradeya gelên Kurdistanê bi wan êrişan têk bibe, ji ber ku gelên Kurdistanê rastiya dewleta Tirk a dagirker nas kiriye û xwe di hêzên leşkerî nexasim gerîlayên HPG'ê de, baş rêxistin kirine û got: "Gerîla îro cewhera parastina doza gelê Kurd e."

Fener Hisên ê ji heman bajarî got: "Li Başûrê Kurdistanê tenê gerîla li hemberî projeya dagirkeriyê ya Tirkiyeyê li ber xwe didin."

Her wiha Hisên piştgiriya xwe ji berxwedana gerîlayan re nîşan da û xiyaneta PDK'ê ya ku rê li ber dagirkirina xaka Başûrê Kurdistanê vedike û bêdengiya hikumeta Iraqê şermezar kir.

Xaliye Temo jî diyar kir ku ne ji gerîla be Kurd li Başûrê Kurdistanê namînin, ji ber ku tenê gerîla Kurdan û doza wan diparêze û li hemberî qirkirinê xwe dikin mertal.

Xaliye Temo di dawiyê de got: "Gerîla li Başûrê Kurdistanê berxwedaneke lehengî û dîrokî didin meşandin, gerîlayên jin jî bûne nimûneya jinên azad. Ji ber wê jî em dibêjin ku em heta pêkanîna armancên gelê xwe, bi wan re ne."

(mh)

ANHA