Têkildarî entegrasyonê panelek hat lidarxistin

Yekitiya Rewşenbîrên Cizîrê li Navenda Çand û Hunerê ya Aram Tîkran a li bajarokê Rimêlanê yê Girkê Legê paneke bi sernavê " Pêvajoya entegrasyona di navbera Rêveberiya Xweser û hikûmeta Sûriyeyê de û hûrguliyên wê" li dar xist.  Hejmarek rewşenbîr û endam û nûnerên partiyên siyasî amade bûn.

Panel bi deqeyek rêzgirtin dest pê kir, paşê hevseroka PYD‘ê Perwîn Yûsif axivî û têkilarî pêvajoya entegrasyonê nirxandin kir.

Perwîn Yûsif anî ziman armanca sereke ji entegrasyonê parastina gel û pêkanîna aştî û aramiyê di navbera pêkhateyên cûda yên gelê Sûriyeyê de ye.

Perwîn Yûsif destnîşan kir ku pêvajoya entegrasyonê di çarçoveya parastina destkeftiyên şehîdan û parastina ewlehî û aramiya herêmê de tê. Her wiha bi bîr xist ku QSD‘ê bi armanca ku herêmê ji şer dûr bixe û destkeftiyên ku di salên dawîn de hatine bidestxistin entegrasyon tercîh kir.

Hevseroka PYD‘ê di dewama axaftina xwe de anî ziman ku bidestxistina aştî û aramiyê ji garantîkirin û parastina mafên gelê Kurd nayê qutkirin û got, divê entegrasyonê li ser bingeha prensîbên demokratîk be û bibe sedema avakirina Sûriyeyek nû ku hemû pêkhate li ser bingeha maf û edaletê bigire nava xwe.

Perwîn Yûsif îşaret bi vê yekê kir ku hinek alî dixwazin pêvajoya entegrasyonê têk bibin. Perwînê bang li hemû aliyan kir ku ji tevlihevî û provokasyonan dûr bikevin û ji bo serxistina pêvajoyê bixebitin.

Beşdaran jî li ser mijara panelê nêrînên xwe anîn ziman. Hate gotin ku divê partiyên siyasî û rewşenbîr berpirsyariyên xwe yên pêvajoyê bi cih bînin û civakê ji hewldanên fitne û kişandina herêmê nava pirsgirkên nû hişyar bikin. Beşdaran ji bo parastina tayemendiyên Kurdî jî girîngiya ku partiyên siyasî yekitiya xwe ava bikin û helwesta xwe bikin yek anîn ziman. Her wiha xwestin ku civînên bi armanca şîrovekirina geşedanên siyasî û pêvajoya entegrasyonê ji gel re were lidarxistin.

(bb)

ANHA