Sînemager Şehîd Mensûr Kerîmyan ber bi Başûr ve hat oxirkirin

Şehîd Mensûr Kerîmyan îro ber bi Başûrê Kurdistanê ve hat birêkirin. Piştî îlankirina şehadetê malbata Şehîd Mensûr hat Rojava û cenazeyê zarokê xwe wegirt. 

Li gel malbatê bi sedan welatiyên Kantona Cizîrê jî cenazeyê Şehîd Mensûr Kerîmyan îro (30 Kanûn 2023) ji Nexweşxaneya El Watanî ya li Dêrikê wergir û bi karwanekî seyareyan ku ji dehan seyareyan pêk tê birin Deriyê Sînor ê Sêmalka.

Şehîd Mensur Kerîmyan li deriyên sînor bi merasîmê oxirî Başûrê Kurdistanê hat kirin. Di merasîmê de Endama Meclîsa Malbatên Şehîdan a Girkê Legê Hezne Temê axivî û êrişên dewleta Trik a dagirker şermezar kirin. Hezne Temê diyar kir ku şehîd Mensûr Kerîmyan, ji bo ku rastiya şoreşa gelê herêmê ji cîhanê re ragihîne hatibû Bakûr û Rojhilatê Sûriyeyê.

Hezne destnîşan kir ku vîn û baweriya wan çeka wan e û ew ê rêya Şehîd Mensur bi serkeftinê tacîdar bikin.

Endamê Navenda Çand û Hunerê ya Aram Tîgran Xelîl Tehlo jî soz da ku ew ê bi pêşxistina kar û xebatan heta bidestxistina serkeftinê li ser rêya Şehîd Mensûr bi meşin.

Piştî axaftinan belgeya şehadetê hat xwendin û radestî malbatê hate kirin.

Li ser navê malbatê Bêrîtan Kerîmyan jî axivî û soza mezinkirina têkoşîna li ser şopa şehîd Mensûr da.

Piştî merasîmê girseyê cenazeyê Şehîd Mensûr bi dirûşme û tîlîliyan ber bi Başûr ve oxir kir.

Li gorî agahiyên ku malbatê dane, cenazeye Şehîd Mensûr wê li warê wî bajarê Sine yê Rojhilatê Kurdistanê were definkirin.

(şx/a)

ANHA