Şehîdên Berxwedana 14'ê Tîrmehê li Bakur û Rojhilatê Sûriyeyê hatin bibîranîn

Partiya Yekitiya Demokratîk (PYD) civîneke girseyî li hola Serdem a taxa Mişêrfe ya bajarê Hesekê yê kantona Cizîrê li dar xist. Di civînê de bi dehan şênî, partî û rêxistinên jinan amade bûn. Di serî de Aldar Xelîl li ser îsrara şoreşgerên 14'ê Tîrmehê û berxwedana wan a li dijî dagirkeriya Tirk axivî.

Navenda Çand û Hunerê ya Xabûr jî li ser berxwedana şoreşgeran fîlm pêşanda û di çalakiyê de endamên navendê û yên Tevgera Hîlala Zêrîn amade bûn.

QAMIŞLO

Li hola Yarîgeha 12'ê Adarê pêşangehek hat lidarxistin û belgefîlm li ser jiyana şehîdên zîndana Amedê hat pêşandan. Di çalakiyê de bi sedan şêniyên bajêr û malbatên şehîdan amade bûn.

TEBQA

Li bajarê Tebqayê Tevgera Ciwanên Şoreşger û Yekitiya Jinên Ciwan jî 2 sînevîzyon li ser berxwedana 14'ê Tîrmehê pêşandan. Yek li pakrewangeha bajêr û ya din li wargeha koçberên Efrîn û Şehbayê.

DÊRIK

Meclisa Malbatên Şehîdan merasîma bibîranînê li parka Çarçela li dar xist. Di merasîmê de bi sedan şênî amade bûn û sînevîzyonek li ser berxwedana 14'ê Tîrmehê hat pêşandan.

AMÛDÊ

Merasîma bibîranînê li parka Înana hat lidarxistin. Beşdaran diyar kir ku şehîd Mazlûm Dogan û hevrêyên wî ji bo şikandina dagirkeriya Tirk xwe kirin çirûska berxwedanê.

Piştre sînevîzyonek li ser berxwedanê û kurtejiyana şehîdan hat pêşandan.

GIRKÊ LEGÊ

Meclisa Malbatên Şehîdan çalakî li parka Sedaqa li dar xist. Tê de şêniyan destnîşan kir ku berxwedana zîndanan bû çirûska têkoşîna gel a ber bi azadî, aştî û demokrasiyê ve.

TIRBESPIYÊ

Meclisa Malbatên Şehîdan li parka 4’ê Nîsanê çalakiyek lidar xist ku bi dehan kes beşdar bûn.

Di çalakiyê de belgefîlmek li ser Berxwedana 14’ê Tîrmehê hate pêşandan. Di çalakiyê de teqezî bi berdewamkirina têkoşînê li gorî ramanên Rêber Abdullah Ocalan û şehîd Mezlûm Dogan hate kirin.

TIL TEMIR

Li kafeterya El Xêma bi amadebûna gelek kesan çalakiyeke bîranînê hate lidarxistin.

Di çalakiyê de hate piştrastkirin ku şehîdên 14’ê Tîrmehê maşaleyên azadî û rûmetê ne ku ji bo nifşan îlham dan.

Çalakî bi pêşandana wêneyan ji arşîvê û siloganên şoreşgerî bi dawî bû.

ÇILAXA

Meclisa Malbatên Şehîdan li parka Jinan bi beşdariyeke berfireh a malbatan, saziyên sivîl û leşkerî çalakiyek li dar xist.

Şêniyên hazir soz dan ku her tim li ser şopa şehîdan bin ta ku azadiya fîzîkî ya Rêber Abdullah Ocalan bi dest bixin û civakeke demokratîk ava bikin.

DÎROKA BERXWEDANA 14`Ê TÎRMEHÊ

Piştî darbeya leşkerî ya 12’ê Îlona 1980`î li Tirkiyeyê, dewleta Tirk li dijî hemû hêzên şoreşger û muxalif hemleyeke mezin a girtinê dest pê kir.

Zindana Amedê sembola qirkirina fîzîkî û psîkolojîk bû, ku girtiyên Kurd rastî rêbazên herî hovane yên îşkenceyê dihatin, tenê ji bo ku teslîm bibin û nasnameya xwe ya Kurdî û dev ji rêgezên yên siyasî berdin.

Berxwedana 14’ê Tîrmehê çalakiya greva birçîbûnê ya vekirî bû ku 4 milîtanên Partiya Karkerên Kurdistanê (PKK) sala 1982’yan li Zindana Amedê, li dijî îşkenceya hovane, şert û mercên nemirovî yên girtinê û polîtîkayên qirkirinê yên li dijî gelê Kurd, dest pê kir.

Her 4 milîtanan, bi rêya girêvê xwestin teslîmkariyê red bikin, nasnameya gelê Kurd û mafên wî yên rewa îsbat bikin. Her wiha xwestin peyamekê bidin derveyî girtîgehê ji bo ku têkoşînê berdewam bikin.

Di encamê de her 4 milîtan şehîd bûn û dengê berxwedana wan li seranserî Kurdistanê belav bû. Êdî ev berxwedan veguherî berxwedana şoreşgerî li dijî dewleta Tirk a faşîst.

Di girêvê de îsbat bû ku felsefeya berxwedanê û fedakariyê serkeftinê bi dest dixe û wê rêgeza fîzolofîk ku azadî nayê dayîn lê belê tê birin sepand.

(mh-ac-şx)

ANHA