Sazî û rêxistinên Bakur û Rojhilatê Sûriyeyê êriş şermezar kirin

Ji şeva berê ve dewleta Tirk a dagirker êrişên nû li dijî binesazî, kombûnên sivilan û navendên hêzên ewlehiyê yên Herêma Bakur û Rojhilatê Sûriyeyê pêk tîne.

Girêdayî wê, meclis û Rêxistinên Civaka Demokratîk, Meclisa Kombûna Jinan a Zenûbiya û şêniyên Herêma Bakur û Rojhilatê Sûriyeyê bi daxuyaniyên cuda êrişên dewleta Tirk a dagirker ên li dijî herêmê, şermezar kirin.

DÊRAZOR

Rêxistinên Civaka Demokratîk ên kantona Dêrazorê bi daxuyaniyekê êriş şermezar kirin. Daxuyanî ji aliyê hevseroka Rêxistinên Civaka Demokratîk ên kantonê Sece El Hiwêdî ve hat xwendin.

Di daxuyaniyê de bang li hêz û rêxistinên navneteweyî hat kirin ku van êrişan bi dawî bikin û sînorekê ji dewleta Tirk a dagirker re deynin û got: "Em ê parastina xwe ya rewa bidomînin. Em ê bi nirxên xwe yên demokratîk ve girêdayî bin. Têkoşîna me ji bo pêşerojeke ewle û îstîqrar e."

DÊRAZOR

Meclisa Kombûna Jinan a Zenûbiya ya kantona Dêrazorê bi daxuyaniyekê êrişên li dijî herêmê şermezar kirin. Di daxuyaniyê de hat diyarkirin ku ev şer, şerê qirkirina hemû gelan û pêkhateyan e. Ev êriş dikevin xana sûcên şer.

Di daxuyaniyê de bang li hêzên navneteweyî hat kirin ku li hemberî herêmê xwedî berpirsiyarî bin.

REQA

Desteya Malbatên Şehîdan û Gaziyan a kantona Reqayê bi daxuyaniyekê ku ji aliyê berdevka Meclisa Jinan a desteyê Ebîr Hac Ebdullah ve hat xwendin, êriş şermezar kirin.

Di daxuyaniyê de bang li rêxistinên navneteweyî û hiqûqî hat kirin ku van sûcan bi dawî bikin.

TEBQA

Girêdayî wê, Rêxistinên Civaka Demokratîk ên kantona Tebqayê bi daxuyaniyekê êrişên li dijî binesaziya herêmê şermezar kirin û wiha hat gotin: "Ev êriş îradeya gelên Bakur û Rojhilatê Sûriyeyê têk nabin. Berdêl çi dibe bila bibe, em ê xaka xwe biparêzin."

Di heman çarçoveyê de, şêniyên kantona Reqayê bi meşek girseyî ku ji pêşiya Nexweşxaneya Zarokan ve dest pê kir, êriş şermezar kirin.

Meş ber bi Qada Jina Azad ve bi rê ket. Li wir endama Meclisa Kombûna Jinan a Zenûbiya Îsra El Hesen axivî û nerazîbûna xwe li hemberî êrişan nîşan da.

Her wiha hevserokê Yekitiya Endazyaran a Reqayê Seid Mustefa destnîşan kir ku êrişên dewleta Tirk a dagirker ên li dijî binesaziya herêmê bi armanca wêrankirina herêmê ne.

Mustefa bang li hêzên navneteweyî kir ku sûcên dewleta Tirk a dagirker rawestînin.

 Li aliyekî din jî hevseroka Desteya Perwerde û Fêrkirinê ya kantona Reqayê Zelîxe Ebdî êrişên li dijî projeya demokratîk a herêmê şermezar kirin.

MINBIC

Li kantona Minbicê, Meclisa Kombûna Jinan a Zenûbiya ya kantonê bi daxuyaniyekê destnîşan kir ku hedefgirtina jinan, zarokan û binesaziya herêmê rûyê rastîn ê dewleta Tirk a dagirker e.

Her wiha, rêxistina Partiya Yekitiya Demokratîk (PYD) ya kantonê bi daxuyaniyekê êrişên li dijî herêmê şermezar kirin. Di daxuyaniyê de hat diyarkirin ku ev êriş sûcên şer û dermirovî ne.

Rêxistinên Civaka Demokratîk û Meclisa Malbatên Şehîdan ên kantonê jî bi daxuyaniyên cuda êrişên li dijî herêmê yên bi armanca pêkanîna projeyên dagirkeriyê û qirkirina gelan ku di encamê de metirsiyê didin seranserî xaka Sûriyeyê, şermezar kirin.

Di dawiya daxuyaniyan de hat gotin ew ê bi hevgirtinê êriş û planên dagirkeriyê têk bibin.

(mh)

ANHA