Şaredariya Til Birakê bi xelkê bajêr re civiya
Şaredariya Gel a Til Birakê bi xelkê bajêr re civiya û xebatên xwe yên sala 2024ˊan ku hîna dewam dikin, ji welatiyan re aşkera kirin û li pêşniyarên wan guhdarî kir.
Şaredariya Gel a bajarê Til Birakê yê kantona Cizîrê bi beşdariya xelkê bajêr, endamên komîn û saziyan, civîneke berfireh li hola meclisa bajêr li dar xist.
Di civînê de hevserokê şaredariyê Mihemed El Hesen lîsteya xebatên wan ên îsal xwend. Ji wan xebatan qîrkirina rêya Recim Fenoş-rêya giştî, rêya Norik-rêya Oslo, El Hemdî û Xirab El Siwêfat, her wiha rêşkirina gelek rê û xîzkirina wan mîna rêya El Tiwêm-rêya giştî, rêya Xirab El Siwêfat-rêya giştî. Li gel wê jî xebatên têkildarî kanalîzayonên li nava bajêr û kunên li ser rêyan ên ji bo baranê agahî hatin dayîn.
Li gorî raporê, xebatên mîna gihandina ava vexwarinê li gundê Mezre û gundê Kermsîn hatine kirin, her wiha torên avê li nava bajarê Til Birak û Simêhan Xerbî hatin firehkirin û parkên Zarokên Şehîdan û 4ˊê Nîsanê hatin sererastkirin.
Dûre şêniyan nîqaş kir û li nêrîn û pêşniyarên wan hate guhdarkirin da ku piştre li planên 2025ˊan werin zêdekirin.
Dê li gundên Isêbix, Simêhan Xerbî û El Hemdî yên bajarê Til Birakê jî hefteya bê civîn werin lidarxistin.
(fr)
ANHA
