Şaredariya Kobanê têkildarî xebatên avahîsaziyê biryarnameyek derxist

Li bajarê Kobanê di pêvajoya dawiyê de xebatên avahîsaziyê ne qanûnî bûn. Li deverên ku qedexe ye avahiyan lê bikin, qanûn binpê dikirin û avahî lê dikirin. Ji ber vê yekê Şaredariya Gel a Kobanê Biryarnameya 9’an derxist. Li gorî vê biryarnameyê divê qanûnên lêkirina avahiyan neyên binpêkirin.

Cîgirê şaredara Kobanê Muslim Muslim der barê biryarnameyê de ji ajansa me re axivî û got: "Biryar ji bo hemû xebatên lêkirine hatiye dayîn. Ji bo lêkirina neqanûnî bandorê li ser projeyên xizmetguzarî, jêrzemîn û berjewendiyên giştî neke, Biryarnameya 9’an hate derxistin."

Muslim bang li welatiyan kir ku biryarnameyê binpê nekin û wiha pê de çû: "Heke lêkirin ne qanûnî be dibe ku di siberojê de bandorê li projeyên giştî bike û em neçar bimînin birûxînin. Piştî ku Biryarnameya 9’an derket, heke xebatên lêkirine ne qanûnî bin em ê li gorî mekanîzemya qanûnî tev bigerin. Welatî berî ku dest bi xebatên lêkirinê bikin bila serî li daîreyên taybet bidin û li gorî qanûnan lê bikin."

Muslim Muslim her wiha got ew ê di çarçoveya qanûnî de bi şêniyan re bibin alîkar û bajarê Kobanê biparêzin.

(np)

ANHA