Rûspiyên qebîleya El Igêdat êrişên hêzên hikumeta Şamê red kirin
Rûspiyên qebîleya El Igêdat êrişên çekdarên "Dîfa Watanî" û hêzên hikumeta Şamê yên li dijî Dêrazorê şermezar kirin û destnîşan kir ku ew li pişta QSD`ê ne ku li hember êrişan disekine û parastina welat dike.
Çekdarên "Dîfa Watanî" û hêzên hikumeta Şamê êrişî bajar û bajarokên rojhilatê kantona Dêrazorê kiribû û di encamê de 13 kes şehîd bûn û 12 jî birîndar bûn. Di nava kuştiyan de zarok jî hene.
Rûspiyên qebîleya El Igêdat a kantona Dêrazorê sûcên hêzên hikumeta Şamê yên li dijî gelê herêmê şermezar kirin.
Rûspiyê qebîleya El Igêdat a bajarokê El Ezbe Ewad Remadan El Elî got: "Em van êrişan bi tundî şermezar dikin. Divê sûriyeyî ji nakokiyên leşkerî dûr bikevin. Ji ber ku wêraniyê bi xwe re tînin. Armanca wan êrişan, têkbirina ewlehiya herêmê û derxistina fitneyê ye."
Rûspiyê êla El Igêdat a bajarokê Xeşam Subah El Emaş got: "Em sûriyeyî malbatek in û em qebûl nakin kesek were û herêmên me tevlihev bike."
El Emaş wiha domand: "Armanceke van tenê ya êrişên hovane yên li dijî sivîl, zarok û jinan heye ku fitneyê di navbera pêkhateyan de derxin."
El Emaş êriş red kirin û wiha pê de çû: "Em van êrişan qebûl nakin. Em li kêleka Hêzên Sûriya Demokratîk (QSD) in."
Rûspiyê ji bajarokê Cidêd Igêdat Fethî El Itêş got: "Em rûspiyên Dêrazorê bi QSD`ê re ne û dê tevahî komployên li dijî herêmê bi bin bixin."
El Itêş wiha axaftina xwe domand: "Em li dijî komployên li dijî gelê me ne. Em êrişên hikumeta Şamê û çeteyên wê şermezar dikin. Bi saya QSD`ê em ê vê komployê têk bibin."
(şx)
ANHA
