PYD’ê li Çilaxayê têkildarî Komploya Navneteweyî civîn li dar xist

Beşdarên civîna li bajarokê Abirê yê Çilaxayê girêdana xwe ya bi felsefeya Rêber Abdullah Ocalan ve û piştgiriya xwe ya ji bo Pêvajoya Aştî û Civaka Demokratîk nîşan da û da zanîn ku serkeftina vê pêvajoyê dê destkeftiyên gelê Kurd biparêze.

ROJANE

8 cotmeh, 2026 14:15

QAMIŞLO

Partiya Yekitiya Demokratîk (PYD) li bajarokê Abirê yê bajarê Çilaxayê bi minasebeta salvegera 28`emîn a Komploya Navneteweyî ya li dijî Rêber Abdullah Ocalan bi dirûşma “Bi Pêngava Aştî û Civaka Demokratîk, Komploya Navneteweyî û pergala Îmraliyê têk diçe” civînek li dar xist.

Di civînê de şêniyên bajarok û gundewarên wê, endamên saziyên civaka sivîl, malbatên şehîdan, nûnerên partiyên siyasî, tevgerên jinan û ciwanan amade bûn.

Civînê bi deqeyeke rêzgirtinê dest pê kir, paşê endamê rêveberiya PYD’ê Salih Botî têkildarî rewşa derketina Rêber Abdullah Ocalan ji Sûriyeyê, destpêkirina komploya li dijî wî û geşedanên siyasî yên dawîn ên li herêmê axivî.

Botî diyar kir komplo di Cotmehê de di dema ku Rêber Abdullah Ocalan ji Sûriyeyê derket û berê xwe da Ewropayê dest pê kir, armanca ji komployê tesfiyekirina Partiya Karkerên Kurdistanê (PKK) û têkbirina hemû hêviyên gelê Kurd ê serhildêr bû, ji ber îradeya Rêber Abdullah Ocalan û berxwedana gelê Kurd armanca komployê pêk nehat.

Salih Botî da zanîn ku aliyên ku beşdarî komployê bûn xwest gelê Kurd, têkoşîna wan a azadiyê têk bibin, pê re jî fikra Rêber Abdullah Ocalan a li dijî desthilatdarî û zîhniyeta baviksalar hedef bigirin.

Salih Botî destnîşan kir ku Rêber Abdullah Ocalan piştî 53 salên têkoşîn û berxwedanê, xebatên xwe yên parastina gelê Kurd û destkeftiyên wan didomîne.

Salih Botî di dawiya axaftina xwe de da zanîn ku dê komplo û pergala Îmralî bi serkeftina Pêvajoya Aştî û Civaka Demokratîk têk biçin, Rêber Abdullah Ocalan dikare istiqrarê pêk bîne û destkeftiyên Kurdan biparêze, her wiha daxwaz kir ku piştgirî ji bo vê pêvajoyê bê dayîn.

Civîn bi sloganan bi dawî bû.

(sb)

ANHA