Li Dêrikê 29 cangorî bi bîr anîn

Şêniyên bajarê Dêrik û Girkê Legê 29 şehîdên Hêzên Pêşîgirtina li ber Madeyên Hişbir bi bîr anîn.

ROJANE

8 cotmeh, 2026 14:07

QAMIŞLO

Hêzên Ewlekariya Hundirîn û Meclisa Malbatên Şehîdan a Dêrikê ji bo 29 şehîdên Hêzên Pêşîgirtina li ber Madeyên Hişbir merasîma bîranînê organîze kir. Dewleta Tirk sala 2023`yan Akademiya Şehîd Nesrîn a li gundê Hemza Beg a herêma Koçarata bombebaran kiribû.

Merasîma bîranînê li Akademiya Şehîd Nesrîn a gundê Hemza Beg hate lidarxistin û bi sedan şêniyên Dêrik û Girkê Legê tev lê bûn.

Piştî deqeyeke rêzgirtinê endamê Meclisa Malbatên Şehîdan a Dêrikê Mihemed Şerîf li ser berxwedan û têkoşîna şehîdan di şoreşa Rojava de axivî û got bi saya wan ew gihaştine deskeftiyên mezin.

Di berdewama merasîmê de nûnerê Hêzên Ewlekariya Hundirîn a Hesekê Meen El Asî axivî, tevahî cangoriyên şoreşa Rojava bi bîr anîn û got dewleta Tirk bi êrişên xwe daxwaz dikir îradeya gelê Kurd bişikîne lê ew negihaşte hedefa xwe û keç û xortên Rojava soz daye ku rêça şehîdan bişopînin û têkoşîna wan berdewam bikin.

Merasîm bi dirûşmên “Şehîd namirin” bi dawî bû.

(np)

ANHA