Nerazîbûnên li hember hedefgirtina rojnamevanan berdewam in

Bi dehan endamên Meclisa bajarê Girê Spî yê dagirkirî, li pêşiya stada 4`ê Nîsanê ya li Minbicê kom bûn û bi daxuyaniyekê êrişa li ser rojnamevanan li Başûrê Kurdistanê şermezar kir.

Endama rêveberiya meclisê Xense Ehmed daxuyanî xwend û diyar kir ku dewleta Tirk bi armanca tunekirina şoreşa jinan û vîna wan a ji ramanên Rêber Abdullah Ocalan wergirtiye, têkoşerên jin dike hedef.

Xense êriş bi tirsonek û xeddar wesifand û di heman demê de teqezî bi berdewamkirina têkoşînê li ser şopa şehîdan kir.

Di dawiyê de Xense bang li civata navneteweyî û rêxistinên hiqûqî kir ku vê êrişê şermezar bikin û hesabê ji dewleta Tirk bipirsin.

HELEB

Meclisa Jinan a Meclisa Malbatên Şehîdan a Helebê bi daxuyaniyekê êrişa li dijî rojnamevanan li Başûrê Kurdistanê şermezar kir. Berdevka Meclisa Jinan a Meclisa Malbatên Şehîdan Delal Mihemed daxuyanî bi beşdariya nûnerên tevger, rêxistinên jinan, partî û saziyên civaka sivîl xwend.

Di daxuyaniyê de hate diyarkirin ku ev êriş, ne ya yekê ye û rastiya siyasetên çewisandinê yên dewleta Tirk ên li dijî gelê Kurd aşkera kir.

Di daxuyaniyê de hate destnîşankirin ku têkoşîna şehîdan a ji bo jiyana azad û wekhev ji gelên herêmê re çirûska bawerî, hêz û rastiyê ye û çi dibe bila bibe, ew dev ji felsefeya Rêber Abdullah Ocalan û dirûşma "jin, jiyan, azadî" bernadin.

HESEKÊ

Li bajarê Şedadê jî Kongra Star têkildarî heman mijarê daxuyanî da.

Di daxuyaniyê de hate diyarkirin ku dewleta Tirk ji bo ku rastiya binpêkirin û sûcên wê yên li dijî gelan aşkera nebe, êriş rojnamevanan dike.

Di daxuyaniyê de soz hate dayîn ku rêya şehîdên rojnamevan û tevahî şehîdên azadiyê bê şopandin.

(şx)

ANHA

EYN ÎSA