Medya erebî li ser zêdebûna tundûtûjiyê li Sûriyeyê û şerê li Îranê nivîsîn

Dezgehên medyayê yên erebî, der barê zêdebûna aloziyên têkildarî şerê Îsraîl-Amerîkî li dijî Îranê û bandorên wê yên herêmî yên berfireh û zêdebûna tundrewiyê li Sûriyeyê nivîsîn.

'QADA TUNDREWIYÊ BERFIREH DIBE: SÛRIYEYÊ LI BER 'TEQÎNEK NÛ' YE'

Rojnameya El Exbar a Lubnanê hişyarî da ku Sûriyeyê ji ber rewşa ewlehiyê ya xerab û berfirehbûna çarçoveya sûcan li ber "teqînek nû" ye.

Li gorî rojnameyê, daneyên meydanî nîşan didin ku kuştinên ji ber sedemên mezhebî berdewam dikin û rewşa ewlehiyê lawaz e. Li aliyekî din  komên tundrew zêde bûne û bi sedan endamên DAIŞ`ê  reviyane û  hin ji wan di nav komên çekdar ên cûrbecûr de tine bicîhkirin.

Rojnameyê her wiha bal kişand ser zêdebûna çalakiyên DAIŞ`ê di meha Adarê de û bi bîr xist ku li çend parêzgehan êriş pêk anîne û di encamê de mirin û birîndarî di nav hêzên girêdayî hikumeta demkî de çêbûn.

ŞERÊ ÎRANÊ Û PLANA LI DIJÎ ÇÎNÊ

Rojnameya El Şerq El Ewset behsa paşxaneya şerê li dijî Îranê kir û diyar kir ku li gor hin teoriyan ev pevçûnê bi rikberiya Amerîka-Çînê ve girêdayî ye. Hin teorî wê wekî berdewama aloziyên demdirêj û hewldanên ji bo sînordarkirina bandora Îranê dibînin.

Rojnameyê destnîşan kir ku armanca sereke kêmkirina hêza Îranê ye, bi taybet di derbarê bernameyên wê yên nuklaerî û mûşekan de, her wiha kêmkirina bandora herêmî ya Tehranê.

HURMUZ QADA MAYÎNAN

Rojnameya Independet Arabia behsa rîskên zêde ên Tengava Hurmuz kir û destnîşan kir ku ji sedî bi qasî 20 petrola cîhanê di tengava Hurmuzê re derbas dibe.

Rojnameyê diyar kir ku Tehran xwedî hêzeke deryayî yên ne-kevneşopî ye, di nav de mayînên deryayî, dron û keştîyên êrişa bilez, ku dikarin tengavê veguherînin herêmek pir xeternak ger pevçûn zêde bibe.

DEWLETÊN KENDAVÊ ZEXTÊ LI AMERÎKAYÊ DIKIN KU ÎRANÊ BÊBANDOR BIKE

Reuters`ê, li ser zimanê çavkaniyên Kendavê, ragihand ku welatên Kendavê naxwazin rasterast têkevin nava şer, lê zextê li Washingtonê dikin da ku Îran nikaribe rêwîtiyê li Tengava Hurmuzê tehdît bike.

Reuters`ê diyar kir ku di demekê de ku hewl didin ku di navbera parastina ewlehiya xwe û dûrketina ji pevçûnek vekirî de hevsengiyek çêbikin, ev welat ji encamên şerekî berfireh ditirsin ku dikare ji kontrolê derkeve.

(k)