Meclisa Malbatên Şehîdan: Divê kujerên şehîd Sîpan werin cezakirin

Li bajarê Til Temir Meclisa Malbatên Şehîdan daxuyanî da. Daxuyanî li navenda Meclisa Malbatên Şehîdan ji aliyê hevseroka meclisê Çinar Salih ve hate xwendin. Malbatên şehîdan, endamên civaka sivîl û nûnerên partiyên siyasî tev li daxuyaniyê bûn. 

Di destpêka daxuyaniyê de bûyera şehîdxistina şervan Sîpan Hiznî hate şermezarkirin û dan zanîn ku divê bûyer nebe bûyera tolrakirinê û ji derveyî qanûnan tev negerin.

Di berdewama daxuyaniyê de hate gotin ku Sîpan Hiznî li ser erka xwe bû, li hember êrişên li ser herêmê civak û herêma xwe diparast, hedefgirtina wî sûc e. Her wiha anîn ziman ku mijar ne tolhildana eşîrî ye û pirsgirêka berê qewimîbû ji aliyê rûspiyên herêmê ve hatibû çareserkirin.

Di daxuyaniyê hate gotin divê bi mentiqê tolhilhidanê nêzî bûyerê nebin û bi rêya saziyên dadê û ewlehiyê were çareserkirin, da ku tevlihevî û fitne li herêmê dernekeve.

Meclisa Malbatên Şehîdan ji saziyên ewlehiyê û dadê daxwaz kir ku kujerên Sîpan Hiznî bigirin û radestî edaletê bikin û qanûnî ceza bikin. Ji rûspiyên herêmê jî daxwaz kirin ku destûrê nedin li herêmê provokasyon werin kirin.

Ji bo bûyerên li Kobanê qewimîn jî hate gotin ku daîreyên îstixbaratê û bi taybet ên dewleta Tirk berpirsyar in, divê xelkê herêmê destûr nede ku şerê navxweyî çêbe û fitne derkeve, têkiliyên êlên Ereban û civaka Kurd were parastin.

Di dawiyê daxuyaniyê de hate gotin divê deskeftiyên şehîdan û fedakariyên wan werin parastin, piştgiriya aştiyê bikin û pirsgirêkên ewlehiyê nekin pevçûnên civakî.

(np)

ANHA