Li Til Birakê 10 dibistan hatin vekirin

Komîteya Rêveberiya Dibistanan a Bajarê Til Birakê 10 dibistan sererast kirin û ji nû ve vekirin.

ROJANE

14 gulan, 2024 13:49

NAVENDA NÛÇEYAN

Sala 2014’an di dema êrişên çeteyên DAIŞ’ê yên li ser bajar û gundên Til Birakê de gelek dibistanan zirar dîtibû.

Komîteya Rêveberiya Dibistanan a Til Birakê bi hevkariya Desteya Perwerde û Fêrkirinê ya Kantona Cizîrê 10 dibistanên ku wêran bûbûn, sererast kirin û ji nû ve vekirin.

Dibistanên ku hatine sererastkirin, li van gundan in; Qayîmmeqam, Xerab Siwêfat, Simêhan Xerbî, Heyayî ya Mezin, Nes Tel, Simêhan Şerqî, Bîr El Hîsan, Girbêjing, Xirbe Sert û Etê.

Ji boneya vekirina dibistanan merasîmek li gundê Qayîmmeqam ê Til Birakê hat lidarxistin. Bi dehan malbatên şehîdan û şêniyên gund beşdarî merasîmê bûn.

Di merasîmê de endamê Meclisa Malbatên Şehîdan Hesen Seîd axivî û spasiya Komîteya Rêveberiya Dibistanan kir.

Hevserokê Komîteya Rêveberiya Dibistanan a Til Birakê Hewaş Hesen jî şehîdên azadiyê bi bîr anîn û got vekirina dibistanan berhemên keda şehîdan e.

Di dawiyê de dayika şehîd Elî Remedan, Emîne Subhî di nav tilîliyên dayikan de dibistana gund vekir.

(bb)

ANHA