Li Tebqayê 1’emîn konferansa Odeya Pîşesaziyê hate lidarxistin

1’emîn konferansa Odeya Pîşesaziyê ya Tebqayê li hola Meclisa Demokratîk a Gelan ya bajarê Tebqayê bi beşdarbûna nûnerên deste û meclisên Rêveberiya Xweseriya Demokratîk, pîşesaz, tevgerên jinan, hêzên ewlehiyê û Konfederasyona Rêxistinên Civaka Demokratîk ên Herêma Bakur û Rojhilatê Sûriyeyê hate lidarxistin.

Di konferansê de hevserokê Rêxistinên Civaka Demokratîk li kantona Tebqayê Ebdulletîf El Fesîh bi xêrhatina beşdaran kir û girîngiya xurtkirina hevkariya di navbera hemû çalakiyên aborî û pîşesaziyê yên li herêmê û pêwîstiya rêxistinkirina sektora pîşesaziyê ji bo pêşxistina wê û rûbirûbûna bi pirsgirêkên aborî yên heyî re piştrast kir.

Piştire hevserokê Konfederasyona Rêxistinên Civaka Demokratîk a Herêma Bakur û Rojhilatê Sûriyeyê Cîhad Hesen rewşa siyasî ya giştî li Sûriyeyê nirxand, rola pîşesazên herêmî di piştgiriya aboriyê û bidestxistina aramiya civakî de, her wiha girîngiya hevkariya di navbera Rêveberiya Xweser û rêxistinên herêmî de ji bo pêşvebirina pêşkeftina aborî destnîşan kir.

Bi navê Rêveberiya Xweser a Demokratîk, hevserokê Meclisa Demokratîk a Gelan a kantona Tebqayê Ehmed El Xelef lidarxistina konferansê pîroz kir û ev gav wekî gaveke erênî ber bi rêxistinkirina sektora pîşesaziyê li kantonê û girêdana wê bi planên aborî yên herêmê ve bi nav kir.

Di konferansê, berdevka Meclisa Jinan a Rêxistinên Civaka Demokratîk a kantonê Fatima El Mihemed, perspektîvên Rêber Abdullah Ocalan xwendin, ku bal kişand ser xurtkirina rola jinan di jiyana aborî û civakî de û piştgiriya pîşesazî û karên hunerî yên herêmî.

Konferans bi xwendin û nîqaşkirina rapora rêxistinî û rêziknameyê dewam kir.

Di dawiya konferans Mîlad Faris û Necah El Şerîf weke hevserokên Odeya Pîşesaziyê ya kantona Tebqayê hatin hilbijartin.

 (ac)

ANHA