Li kantona Cizîrê dê rojên şemiyê jî perwerde bê dayîn

Desteya Perwerde û Fêrkirinê ya Kantona Cizîrê ji ber şewban û barîna berfê navber dabû perwerdeyê. Ji bo temamkirina dersên nehatine dayîn, dê heta dawiya sala xwendinê, li dibistanên seretayî, navîn û amadeyî rojên şemiyê jî perwerde hebe.

ROJANE

6 ÇILE, 2026 10:54

QAMIŞLO

RÛŞAN EZEM

Desteya Perwerdeyê û Fêrkirinê ya Kantona Cizîrê ya Bakur û Rojhilatê Sûriyeyê, ji bo pêşxistin û xurtkirina xwendekaran roja şemiyê li bernameya perwerdeyê zêde kir. Li herêmê ji ber nexweşiyan û barîna berfê navber dabûn perwerdeyê. Hem ji bo dersên di wan deman de nehatibûn dayîn temam bikin, hem jî bilindkirina asta xwendekarên ku asta wan kêm e, ev biryar hat dayîn. Ji bo roja zêdekirina perwerdeyê jî roja şemiyê hat diyarkirin.

Dê dibistanên seretayî, navîn û adamedeyî beşdarî vê perwerdeyê bibin. Ev perwerde ji refa yekê heya ya 12’an dê were dayîn, her wiha dê heya dawiya salê dewam bike.

Desteyê diyar kir ku heta niha li Qamişloyê tenê dest pê kiriye û dê li bajarên din jî dest pê bike, nikarin niha hejmara xwendekarên ku beşdar bibin ragihînin. Her wiha saetên dersan dê li gorî pêwîstiyê bên diyarkirin.

Hevserokê Desteya Perwerdê û Fêrkirinê ya Kantona Cizîrê Adnan Berî da zanîn ku ev perwerde ji bo xwendekaran dê bibe lêvegerek û her wiha amadekariyek ji bo derbasbûna zanîngehan.

ANHA