Li Hesekê tevgera motorsîkletan hate qedexekirin

Fermandariya Giştî ya Hêzên Ewlekariya Hundirîn (Asayîş) ên Parêzgeha Hesekê bi biryarekê tevgera motorsîkletan li bajar qedexe kir.

Di daxuyaniyê de hate diyarkirin: "Hêzên me di demên dawîn de zêdebûneke berbiçav a binpêkirinên ji ber bikaranîna nerast a motorsîkletan li bajarê Hesekê dîtiye. Ev binpêkirin ne tenê bi tevgera trafîkê ve sînordar in, lê bûne amûrek ji bo tirsandinê, gulebaranên bêserûber, birîndarkirina sivîlan û çalakiyên neqanûnî ku bandorê li ewlehiya bingehîn û aramiya civakê dikin.”

Di daxuyaniyê de her wiha hate gotin: "Ji bingeha berpirsyariya me ya neteweyî û exlaqî ya parastina aştiya navxweyî û li gorî biryar û qanûnên rêxistinkirina motorsîkletan, her wiha ji ber pêdiviyên ewlehiyê, em van biryaran didin:

- Tevgera hemû cureyên motorsîklêtan (sivîl û leşkerî) di sînorê îdarî yê bajarê Hesekê de qedexe ye.

- Ev biryar di cih de dikeve meriyetê. Li gorî nirxandinên rewşa ewlehiyê heta agahdariyeke din dê di meriyetê de bimîne.

- Aliyên têkildar dê li dijî kesên ku biryarê binpê dikin, dest bi girtekên qanûnî yên tund bikin.

- Her kesek ku biryarê binpê bike dê tavilê motorsîkleta wî were girtin û li gorî qanûnan miqdareke cezayê pere lê were birîn.”

Di dawiya daxuyaniyê de hate gotin "Em piştrast dikin ku ev biryar beşeke erka me ya parastina we û rêgirtina li wan Kesan e ku dê aramiya bajarê me xera bikin. Em ji tevahî welatiyan dixwazin ku bi hêzên ewlehiyê re hevkariyê bikin da ku serkeftina vê gavê misoger bikin û aramî li seranserê bajarê me pêk were.”

(bb)