Li Hesekê gumanbarê guleyan hat girtin

Duh (15 Îlon), li taxa Til Hecerê ya Hesekê, piştî nakokiya di nava hejmarek kesan de, gule li erebeyekê hat barandin. Hêzên Ewlekariya Hundirîn gumandarek girt, çek û cebilxaneyên girêdayî bûyerê desteser kirin, di heman demê de hewldanên girtina kesekî dîtir didomin.

Fermandariya Giştî ya Hêzên Ewlekariya Hundirîn a Parêzgeha Hesekê diyar kir ku dewriyeyên Hawarî bi hevrêziya Beşa Lêkolîna Tawanan û Tîma Lêkolîna Cihê Bûyerê re berê xwe da cihê bûyer, delîl kom kirin, di encamê de gumanbarek hat girtin û hewldana girtina kesekî din didome.

Fermandariyê diyar kir ku çek û cebilxaneyên girêdayî bûyerê; weke klaşînkovê, cercur û mîqdarek fîşek, hejmarek roket hatin destserkirin.

Li gorî daneyên destpêkê, piştî kesekî êrişî mala yekî kir bûyer pêk hat. Lêpirsînên aşkerakirina hûrgiliyê û diyarkirina berpirsan didomin.

Fermandariyê her wiha destnîşan kir ku li dijî her kesê îsbat bibe destê xwe di bûyerê de heye wê ji aliyên eleqedar re were rakirin û bang li welatiyan kir ku agahiyên nebelgekirî parve nekin û xwe bispêrin agahiyên li ser malperên fermî yên Hêzên Ewlekariya Hundirîn ên Parêzgeha Hesekê tên parvekirin.

(f)