Li 9 bajaran Cejna Vejînê bi coş hat pîrozkirin

Bi boneya salvegera 41’emîn a Pêngava 15’ê Tebaxê li herêmên Bakur û Rojhilatê Sûriyeyê şahî hatin lidarxistin.

TIL TEMIR

Tevî endamên saziyên civaka sivîl û rêxistinên jinan, bi sedan şêniyên bajar û gundewarê Til Temirê salvegera pêngava 15’ê Tebaxê li xwaringeha Kinêr a naverasta bajar pîroz kir. Di pîrozbahiyê de wêneyên Rêber Abdullah Ocalan hatin hildan û pankartên bi nivîsên domandina têkoşînê ta azadiya fîzîkî ya Rêber Abdullah Ocalan û mîsogeriya mafên gelan hatin vekirin.

Pîrozbahî bi deqeyek rêzgirtin dest pê kir. Piştre bi navê Meclisa Malbatên Şehîdan Selman Nûhî axivî. Selman Nûhî salvegera Cejan Vejînê (15’ê Tebaxê) pîroz kir û got, 15’ê Tebaxê guhertineke dîrokî bû ku hêvî da gelên herêmê û rêya berxwedanê nîşan da.

Ji fermandarên Meclisa Leşkerî ya Til Temirê Ferhad Emîn jî bal kişand ser rola fermandar Egîd ê ji pêşengtî ji pêngavê re kir û hevalên wî.

Di şahiyê de ji rêveberên Kongra Star Sena El Samir jî guleya yekemîn a di 15’ê Tebaxê de hate teqandin wekî serhildana fikirî û xeta azadiya jinan bi nav kir.

Piştî axaftinan de çalakiyên hunerî hatin lidarxistin û dirûşmên berxwedan û yekitiyê hatin berzkirin.

HESEKÊ

Li bajarê Hesekê jî salvegera Pêngava  15`ê Tebaxê li Parka 4’ê Nîsanê bi coş hat pîrozkirin.

Pîrozbahî bi deqeyeke rêzgirtin dest pê kir. Piştre bi navê Meclisa Malbatên Şehîdan Hesen Berko axivî.

Hesen Berko anî ziman ku destkeftiyên hatine bidestxistin berhemên keda şehîdan û pêngava 15’ê Tebaxê ne.

Piştre ji fermandarên QSD’ê Hazim Zîlan axivî, li dijî hemû cûreyên êriş û binpêkirinan soza domandina rêya şehîdan da.

Di şahiyê de stran hatin gotin û govend hatin gerandin. Girse li ber stranan govend gerandin.

DÊRIK

Xelkê bajar û gundewarê Dêrikê jî Cejna Vejînê  li Parka Azadî pîroz kir.

Pîrozbahî bi deqeyeke rêzgirtin ji bo bîranîna cangoriyên azadiyê dest pê kir. Piştre endama Meclis Malbatên Şehîdan a Dêrikê Sureya Hebeş axivî û anî ziman ku Pêngava 15’ê Tebaxê çirûska azadî û têkoşînê bû.

Piştre komên mûzîkê yên Serdem û Hêvî stran gotin. Girse li ber stranan xelekên govendê gerandin.

GIRKÊ LEGÊ

Bi heman boneyê Partiya Yekitiya Demokratîk (PYD) şahiyek li qada Şehîd Xebat a li bajarê Girkê Legê li dar xist. Şêniyên Girkê Legê, Rimêlan û Çilaxa jî beşdarî pîrozbahiyê bûn.

Di pîrozbahiyê de bi navê Meclisa Malbatên Şehîdan Fatima Lekto axivî. Fatima 15’ê Tebaxê bi mîlada têkoşînê bi nav kir û ev li gotinên xwe zêde kir "15’ê Tebaxê û baweriya gelê Kurd a bi xwe zindî kir. " Her wiha îşaret pê kir ku Pêngava 15’ê Tebaxê ji bo tevahî gelên herêmê yên azadîxwaz mîraseyek e.

Piştre hejmarek dengbêj daketin ser dikê û stran gotin. Şahî bi gerandina  govendan bi dawî bû.

TIRBESPIYÊ

Pêkhateyên Kurd, Ereb û Suryan ên Tirbespiyê jî salvegera Pêngava 15’ê Tebaxê li Parka 4’ê Nîsanê pîroz kir. Piştî deqeya rêzgiritn, bi navê Meclisa Malbatên Şehîdan Dîrok Mele Beşîr axivî. Dîrok di kesayeta fermandar Egîd (Mahsûm Korkmaz) û Nûreddîn Sofî de tevahî şehîdên têkoşîna azadiyê bi bîr anîn.

Endama Kongra Star Xaliya Ehmed jî bal kişand ser rola jinan di meşa azadiyê de. Bi navê QSD’ê Mihemed Zêdan jî heya avakirina Sûriyeya demokratîk a nenavendî soza domadina xeta şehîdan da.

Şahî bi stran û govendan bi dawî bû.

KOBANÊ

Bi hezaran şêniyên kantona Firatê jî salvegera Pêngava 15’ê Tebaxê li qada Şehîd Egîd pîroz kir. Hevserokê Meclisa Malbatên Şehîdan a Kantona Firatê Mihemed Bozê di axaftina xwe de Pêngava 15’ê Tebaxê wekî serhildana li hember siyasetê înkar û tundiyê bi nav kir. Her wiha anî ziman ku Şoreşa Rojava û damezirandina Rêvebera Xweser berhema pêngava 15’ê Tebaxê ne.

Di pîrozbahiyê de stran hatin gotin û helbest jî hatin xwendin. Di dawiyê de li ber stranan govend hatin gerandin.

HELEB

Bi sedan şêniyên taxên Şêxmeqsûd û Eşrefiyê yên Helebê li qada Şehîdên Berxwedanê bi dirûşmeya "Bi rihê Pêngava 15'ê Tebaxê, destana vejînê ber bi civakeke demokratîk, aştî û misogerkirina azadiya Rêber Abdullah Ocalan ve" pîrozbahî li dar xist.Li ser navê şêniyên her du taxan Bêrîtan Botan axivî û piştrast kir ku Pêngava 15’ê Tebaxê li seranserê Kurdistanê çirûska şoreşan pêxist. Bêrîtan got, dê heta avakirina civakek azad û demokratîk têkoşînê bidomînin.

Piştî axaftinan komên mûzîk û govendan hunerên xwe pêşkêş kirin. Pîrozbahî bi dirûşmên dilsoziya bi şehîdan û banga azadiya fîzîkî ya Rêber Abdullah Ocalan bi dawî bû.

AMÛDÊ

Şêniyên Amûdê û koçberên ji kantona Efrîn-Şehbayê jî salvegera Pêngava 15’ê Tebaxê bi coş pîroz kir. Pîrozbahî li hola Kerem a li rojavayê bajarê Amûdê hat lidarxistin. Li hola pîrozbahiyê wêneyên Rêber Abdullah Ocalan, şehîd Egîd, Nûreddîn Sofî, Koçero Ûrfa  hatin daliqandin.

Piştî deqeya rêzgirtinê, têkoşer Ridwan Nesrî yê ku ji girtîgehên dewleta Tirk a dagirker de azad bûye, axivî. Ridwan Nesrî anî ziman ku Pêngava 15’ê Tebaxê vejîna Kurd e û wiha got: "Ji wê rojê ve navê Kurdistanê zindî ye. Eger îro em hene ev jî bi saya pêngavê û ramanên Rêber Abdullah Ocalan in.

Piştre endamê Meclisa Malbatên Şehîdan Lazgîn Derwîş destnîşan kir ku Fermandar Egîd û hevalên wî li ber xwe dan û serkeftin pêk anîn, gelê Kurd jî li ser şopa wan li ber xwe da û bi hezaran şehîdan di rêya azadiya welatê xwe û doza Kurd de dane.

Ji  fermandarên Meclisa Leşkerî ya Amûdê Berxwedan Amûdê bi bîr xist ku Pêngava 15’ê Tebaxê bersiva li hemberî siyasetên înkar û qirkirinê ye.

Di dewama pîrozbahiyê de endama Kongra Star Mura Zoro pêngav wekî destpêka vejîna Kurdî nirxand û soza domandina rêya şehîdan jî da.

Di dawiyê de Koma Şehîd Agirî, hunermend Delîla û Danîş Botan stranên şoreşgerî gotin. Girse jî bi coş govend gerandin.

DIRBÊSIYÊ

Şêniyên bajar û gundewarê Dirbêsiyê tevî endamên saziyên sivîl salvegera Pêngava 15’ê Tebaxê li Parka Şehîd Zevîn a li bajar pîroz kir.

Piştî rêzgirtinê axaftin ji aliyê hevseroka Meclis Bajarê Dirbêsiyê Raziya Îbrahîm, rêvebera Meclisa Kongtra Star a bajarê Dirbêsiyê Silava Simo û endamê Meclisa Malbatên Şehîdan Mihemeb Nebî Kotê ve hatin kirin. Di axaftinan de şehîdên azadiyê hatin bibîranîn û hate gotin Şoreşa 19’ê Tîrmehê berhema Pêngava 15’ê Tebaxê ye. 

Di axaftinan de hate destnîşankirin ku dê bi rihê Pêngava 15’ê Tebaxê ji bo avakirina aştî û civaka demokratîk bixebitin.

Piştî axaftinan Koma Zîlan a girêdayî Tevgera Çand û Hunerê ya Dirbêsiyê, hunermend Selman Îbrahîm û Tariq Mihemed stran gotin. Pîrozbahî bi gerandina xelekên govendê li ser stranên şoreşgerî bi dawî bû.

(ac/bb)

ANHA