Di şahiya 15`ê Tebaxê de: Em li dijî hemû komployan kelehek bihêz in

Partiya Yekîtiya Demokratîk (PYD) û Kongra Star bi boneya pêngava 15`ê Tebaxê li Parka Azadî ya bajarê Qamişlo şahiyek li dar xist.  Şêniyên Qamişlo û nûnerên saziyên leşkerî û sivîl tevlî şahiyê bûn.

Şahî bi deqeyek rêzgitinê des pê kir. Pişt re ji rêveberên Meclisa Malbatên Şehîdan Şaziya Elî axivî û gelê kurd bi boneya 15`ê Tebaxê pîroz  kir. Şaziya destnîşan kir ku vê rojê şopek girîng di dîroka têkoşîna şoreşgerî ya gelê Kurd de hiştiye. Ew bersivek bû li hembar rejîmên otorîter û zordar.

Endamê Fermandariya Giştî ya QSD`ê Luqman Xelîl jî di şahiyê axivî û got, "Destpêkirina pêngava 15`ê Tebaxê bersivek girîng bû li hember rejîmên otorîter ên zordar ku polîtîkayên înkar, dûrxistin, kuştin û qirkirinê li dijî gelê Kurd û Tevgera Azadiya Kurdistanê bi rê ve dibirin. "

Xelîl wiha berdewam kir, "15`ê Tebaxê li ser bîrdozî û ramana azadiya gelê Kurd, biratiya gelan, jiyana hevbeş û pêkanîna edaletê, ku xwe dispêre raman û felsefeya Neteweya Demokratîk hatiye desptêkirin. Ev ramana ku Rêber Abdullah Ocalan bingeha wê daniye. "

Xelîl ev li gotinên xwe zêde kir, "Hebûna vê girseya gel di vê şahiyê de, peyamek zelal e ji bo her dijminekî ku hewl dide yekîtiya gelê me têk bibe. Em li dijî hemû planên fitneyê kelehek bihêz in, û gelê me nêzîkî me ye, weke çawa em nêzîkî wan in."

Luqman Xelîl wiha dawî li axaftina xwe anî "Pêngava 15`ê Tebaxê ne tenê bûyerek demkî bû, lê belê qonaxek girîng a têkoşînê bû ku bingehên berxwedana nûjen danî û rola gelê Kurd  xurt kir, wekî hêzek bi bandor di diyarkirina çarenûsa herêmê de, bi hevkariya hemû pêkhateyan. "

Şahî bi bernameya hunerî berdewam kir,  Koma Botan, Koma Elefteriya û komek hunermandan stranên şoreşgerî stran.

Şahî bi gerandina govendê û  durişmên "Bê serok jiyan nabe", "Şehîd zindî ne û namirin", "Bijî QSD" û "Gerîla, hêviya gelan e" bi dawî bû.

(k)

ANHA