Kurtejiyana şehîd Mehmûd El Wero 

8`ê Cotmehê dewleta Tirk a dagirker Akademiya Hêzên Têkoşîna li Dijî Madeyên Hişbirê ya li bajarê Dêrikê yê kantona Qamişloyê kir hedef û di encamê de Mehmûd El Wero û 28 hevrêyên xwe şehîd bûn.

Mehmûd El Wero, sala 1992`yan li gundê Um El Îzam ê bajarokê Ebû Firi yê navçeya Tirbespiyê ya kantona Qamişloyê ji dayik bûye û li gund xwendina seretayî û navîn diqedîne. Sala 2018`an jî tev li Hêzên Ewlekariya Hundirîn dibe.

Şehîd Mehmûd di malbateke welatparêz a Ereb de mezin dibe ku 4 bira û xwişkên wî hene.

Şehîd Mehmûd bi exlaqê xwe, dilsoziya xwe di kar û welat de tê naskirin. Piştî êrişên çeteyan bilez tev li hêzên parastinê dibe. Li ser wê esasê birayên wî jî tev li QSD û Hêzên Ewlekariya Hundirîn bûn.

Şehîd Mehmûd bi ramana biratiya gelan û projeya neteweya demokratîk bawer bû û di dan û standinên xwe yên li gel heval û cîranên xwe de ev bawerî îsbat kir. Şehîd Mehmûd bavê du zarokan e û navekî kurdî an ku navê Şêrîn dide keça xwe.

Der barê jiyana şehîd Mehmûd de xwişka wî Xaliye El Wero behsa bîranêna birayên xwe yên zarokatiyê kir: “Dilgeş bû û rihetî dida malê. Di dan û standinên xwe de baş bû. Erkên xwe bi rêk û pêk dikanî cih. Ji ber wê her tim xelkê gund pesna wî didan. Ez pê serbilind bûm û hîna serbilind im.′′

Xaliye diyar kir ku birayê wê Mehmûd beşdarî operasyoênên ewlehiyê yên li Holê bû û got: "Parastina herêmê û şêniyan wekî erkekî xwe didît û ji malbatê re jêdera hêzê bû.′′

Xaliye êrişên dewleta Tirk a dagirker ên li dijî herêmê şermezar kirin û soz da ku dê rêya şehîdan bidomînin û berdêl çi dibe bila bibe rêya zarokên xwe temam bikin

Xaliye bang li hevrêyên birayê xwe yên di nav Hêzên Ewlekariya Hundirîn de kir û got: “Parastina herêmê û şopandina rêya şehîd Mehmûd, erka we ye.”

`EM DÊ TOLA ŞEHÎDAN Û WELATÊ XWE HİLÎNİN`

Birayê şehîd ku şervanê QSD`ê ye Ebdulqadir El Wero balkişand ser baldariya birayê xwe li ser hurgiliyên danûstandina li gel kesên din û got: “Dema ez tev li pêngava xurtkirina ewlehiyê ya Dêrazorê bûm, birayê min ji min re digot, baldar be, xwe û hevalên xwe biparêze. Girîngî dida hûrgiliyên biçûk û eleqeyeke mezin dida têkiliyên bi derdorê re."

Ebdulqadir anî ziman ku ew ê rêya birayê xwe  berdewam bike û tola wî û welêt hilîne û wiha dawî li axaftina xwe anî: “Em 4 bira ne, em ê rêya birayê xwe Mehmûd berdewam bikin. Çi dibe bila bibe em ê herêm û xelkê xwe ji êrişan biparêzin. Bila dijmin bizanibe ku kurê wî dê cihê bavê xwe bigre û rêya wî temam bike. Têkoşîna me berdewam e heta serkeftin pêk were.”

(şx)

ANHA