Koçberên Efrînê û şêniyên Şehbayê: Em ê berxwedana li dijî êrişan bidomînin

Koçberên Efrînê û şêniyên Şehbayê bi xwepêşandanan êrişên dewleta Tirk a dagirker û çeteyên wê li dijî sivîlên ewle yên Herêma Bakur û Rojhilatê Sûriyeyê şermezar kirin. Her wiha wan teqezî bi domandina berxwedanê li dijî dagirkeriyê û êrişên wê da.

ROJANE

24 cotmeh, 2024 19:37

ŞEHBA

Bi hezaran koçberên Efrînê û şêniyên Şehbayê li kantona Efrîn û Şehbayê bi xwepêşandanekê êrişên dewleta Tirk a dagirker ên li dijî Herêma Bakur û Rojhilatê Sûriyeyê şermezar kirin.

TIL RIFET

Xwepêşandanê ji qada Bazarê dest pê kir û ber bi çerxerêya Zeytûn ve bi rê ket. Li wir endamê Meclisa bajarê Til Rifetê Reşîf Fetko êrişên dewleta Tirk a dagirker û çeteyên wê yên li dijî sivîlan bi tundî şermezar kirin û soza şopandina rêya şehîdan û fikrên Rêber Abdullah Ocalan nû kir.

Endama Meclisa bajarokê Şêrewa Medîha Şêx Xelîl hevdîtina Rêber Abdullah Ocalan bi malbata wî re pîroz kir, şehîdên berxwedanê bi bîr anîn û sîxurên ku xwe ji bo pereyan firotine dewleta Tirk a dagirker şermezar kirin.

FAFÎN

Xwepêşandanê ji gundê Babinisê dest pê kir û ber bi qada Siwaqa ya bajarokê Fafînê ve bi rê ket. Li wir endamê Meclisa Kampa Berxwedan Şoreş Îsa komploya navneteweyî ya li dijî Rêber Abdullah Ocalan, êrişên li dijî herêmê şermezar kirin.

Endama Meclisa bajarokê Fafînê Meryem Saxir destnîşan kir ku êrişên dewleta Tirk a dagirker û çeteyên wê yên li dijî herêmê dikevin xana sûcên şer.

KEFER QARIS

Li gundê Kefer Qaris, koçberên Efrînê, şêniyên bajarokê Ehresê û kampa Serdem bi xwepêşandanekê êriş şermezar kirin.

Hevserokê kantona Efrîn û Şehbayê Bekir Elo soza domandina berxwedanê li ser şopa Rêber Abdullah Ocalan nû kir û diyar kir ku çareseriyên hemû pirsgirêkên Rojhilata Navîn di destê Rêber Abdullah Ocalan de ne.

Endama Meclisa Malbatên Şehîdan a kantona Efrîn û Şehbayê Xedîce Îbo diyar kir ku Rêber Abdullah Ocalan çareseriya hemû pirsgirêkan e û got: "Dagirkeriya Tirk hevdîtina Rêbertî bi malbata wî re qebûl nekir, berê xwe da hedefgirtina sivîlên Bakur û Rojhilatê Sûriyeyê."

(mh)

ANHA