Ji tîmeke paşguhkirî ber bi wergirtina Lîsansa Zêrîn; Akademiya Biratî

Di sala 1978`an de, komek ciwanan ji bajarê Tirbespiyê li herêma Cizîrê yaneyeke futbolê ya xwecihî damezrandin. Jina bi navê Hayat, ji malbata Haco, navê wê kir "Biratî. Di wê demê de, tîmê ji bo zarokên taxên karker û xizan derfeta werzîşê ya girîng peyda kir, di demekê de ku çalakiyên werzîşê yên Kurdî bi astengiyên ewlehiyê yên giran re rû bi rû bûn.

Di salên desthilatdariya Baasiyan de, tîm, mîna gelek çalakiyên çandî û werzîşî yên serbixwe yên Kurd, bi berdewamî rastî zextên ewlehiyê hatin. Navê wê heta guherî û kirin "Tişrîn El Sewra" wekî beşek ji polîtîkayên Partiya Baasê ji bo jêbirina hemû şopên nasnameya Kurd.

Der barê mijarê de Hacî Biratî, rêvebirekî kevin ê tîm û akademiyê, got ku kombûnên werzîşî yên wê demê rastî qedexeyên ewlehiyê hatin. Hacî wiha dewam kir, "Yarîgehên me yên guncaw tunebûn, me li qadên axê perwerde dikir û tenê kombûna li wir hişt em rastî zilmê werin. Rejîmê hewl da ku her çalakiyek ku mirovên ji herêmê li derveyî saziyên xwe yên Baasiyan dicivîne, bitepisîne."

Bi destpêkirina Şoreşa 19`ê Tîrmehê û damezrandina Rêveberiya Xweser re, qonaxek nû ji bo tîmê dest pê kir. Di sala 2015`an de, ew veguherî akademiyeke futbolê ku bernameyên perwerdehiyê yên nûjen ji bo ciwanan bi kar tîne. Di dawiya sala 2024`an de bi wergirtina Lîsansa Zêrîn a AFC gihişt qonaxek girîng.

Îro, Akademiya Biratî li bajarên Qamişlo, Amûdê û Tirbespiyê yên herêma Cizîrê navendên perwerdehiyê hene, her wiha navendeke nû li Parêzgeha Laziqiyê jî vekiriye. Zêdetirî hezar zarok li navendên wê bi buhayek sembolîk perwerde didin.

Kapîtan Îmad Îsa, rahênerê golparêzan û lîstikvanê berê yê yaneya El Cîhad û tîma neteweyî ya Sûriyeyê, diyar kir ku akademî niha zarokên ji 4 heta 14 salî, hem kur û hem jî keç, li gorî bernameyek diyar perwerde dike.

Îmad Îsa bang li rayedarên ku sektora werzîşê li Rojava û Sûriyeyê dişopînin kir ku stadyûmek rast ava bikin û piştgiriyê bidin akademiyê. Her wiha diyar kir ku bi sedan zarok niha li ser yarîgehe axê ya li bajarê Tirbespiyê perwerdeyê dikin.

Di salên dawî de, li yarîgehên akademiyê, bi taybetî li yarîgeha Heysem Kiço li Qamişlo, gelek malbatan zarokên xwe qeyd kirine.

Çalakiyên akademiyê her wiha berfireh bûne û înîsiyatîfên dilxwazî ​​û civakî, wekî kampanyayên paqijkirina kolan û bazarê jî pêk tîne.

Akademiya Biratî ji tîmeke herêmî ya jibîrkirî û dûrxistî veguheriye saziyeke werzîşê ya pêşeng û bûye modelek berbiçav ji bo pêşxistina jêhatîbûna ciwanan li Rojava.

(k)

ANHA