Ji bo bîranîna Berxwedêrên 14ˊê Tîrmehê rêzeçalakî hatin lidarxistin

Ji bo bîranîna salvegera Berxwedana 14ˊê Tîrmeha 1982ˊyan ku bi pêşentiya şehîd Xeyrî Dûrmûş, Kemal Pîr, Akif Yilmaz û Alî Çîçek hatiye kirin, vê êvarê li Herêma Bakur û Rojhilatê Sûriyeyê rêzeçalakî hatin lidarxistin.

QAMIŞLO

Li Qamişlo, Komîna Film a Rojava ji bo bîranîna şehîdan filmek li ser Berxwedana 14ˊê Tîrmehê pêşkêş kir.

Film 2 saet û 30 deqe bû û tê de xelkê bajêr beşdar bûn.

Di vê çarçoveyê de, Partiya Yekitiya Demokratîk (PYD) bi hevkariya Kongra Star ji xelkê taxên bajêr re civînek li dar xist.

Her wiha xelkê taxên Enteriyê, Qidorbeg, Cûdî, Meyselon, Aşûriye û Arbewiye beşdar bûn.

Her wiha sînevîzyonek li ser Berxwedana 14ˊê Tîrmehê hat pêşkêşkirin. Dûre endamê PYDˊê Mihemd Ehmed li ser berxwedana şehîdan axivî.

Ehmed wiha got: "Gelê berxwedêr dê bigihîen armanca xwe ya azadî û jiyana birûmet."

Ehmed wiha domand: "Ruh û mîrasa 14ˊê Tîrmehê hîna dewam dike. berxwedana gerîla wî ruhî nîşan dide. Berxwedana Rêber Abdullah Ocalan a li girtîgeha Îmraliyê rê li pêş şoreşger û berxwedêran vekir. Armanc jî serkeftin e"

Her wiha bi heman boneyê civînek li taxa Kornîş ji xelkê taxên Xerbî hat lidarxistin.

DIRBÊSIYÊ

Li bajarê Dirbêsiyê yê kantona Cizîrê, ciwanên bajarên Dirbêsiyê, Til Temir û Zirganê meşeke girseyî li dar xist.

Meş ji pêş navenda Tevgera Ciwanên Şoreşger dest pê kir û ber bi kolana sûka navendî ve çû. Di meşê de wêneyên Rêber Abdullah Ocalan, alên Tevgera Ciwanên Şoreşger a Sûriyeyê, alên HPGˊê, YJA-Star hatin hildan.

Li kolana sûka navendî, endama rêveber a Tevgera Ciwanên Şoreşger a Dirbêsiyê Soriyaz Simo axivî û got: "Berxwedana şehîdên 14ˊê Tîrmehê ji tevahî cîhanê re rastiya berxwedana gelan li pêş desthilatên faşîst îsbat kir."

KOBANÊ

Ji bo bîranîna Şehîdên Berxwedana 14ˊê Tîrmehê bi sedan xelkê Kobanê yê kantona Firatê li pêş Navenda Baqî Xido ya Çand û Hunerê kom bûn.

Li navendê ji bo bîranîna Şehîdên Berxwedana 14ˊ Tîrmehê mûm hatin pêxistin û filmek li ser berxwedan wan hate pêşkêşkirin.

HELEB

Bi dehan xelkê taxên Şêxmeqsûd û Eşrefiyê li qada şehîdan a li beşa rojava ya taxa Şêxmeqsûdê kom bûn û beşdarî civîna ku Partiya Yekitiya Demokratîk (PYD) li dar xistiye bûn.

Di civînê de endamê Meclisa Giştî ya PYDˊ Ferhan Kobanê axivî û bal kişand ser berxwedana koma îdeolojî ku Rêber Abdullah Ocalan li dijî rejîma faşîst a 12ˊyê Îlonê ava kiriye.

Ferhan Kobanê sedemên ku Akif Yilmaz, Alî Çîçek, Kemal Pîr û Mihmet Heyrî Dûrmûş ketina ˊRojiya mirinêˊ diyar kirin û got: "Ew girev ji bo bersivdana siyasetên dewleta Tirk a dagirker ên qirkirina li dijî Kurdan bû."

Piştî axaftin bi dawî bû, sînevîzyonek li ser têkoşîna Berxwedana 14ˊê Tîrmehê hat pêşkêşkirin.

REQA

Tevgera Ciwanên Şoreşger a kantona Reqa û xelkê wê 2 çalakî li dar xistin.

Endamên Tevgera Ciwanên Şoreşger bi beşdariya şêniyan li pêş avahiya Meclisa Giştî ya Mezreya Kîsra Şêx El Cuma kom bûn û beşdarî meşê bûn.

Meş ber bi mezreya Kîsra Şêx El Cuma ve bi rê ket. Li wir hevseroka tevgerê Letîfe El Hesen daxuyaniyek xwend. Di daxuyaniyê de hate gotin Berxwedana Girtîgeha Amedê li dijî hovîtî û îşkenceya li ser têkoşeran bû. Ev berxwedana bi berxwedana şehîd Mazlûm Dogan re dest pê kir.

Girêdayî heman mijarê, xelkê bajarê Reqa ji bo bîranîna Şehîdên Berxwedana 14ˊê Tîrmehê li hola Tac çalakiyek li dar xist.

Di çalakiyê de şêwirmendê Meclisa Rêveber a Rêveberiya Xweseriya Demokratîk a kantona Reqayê Ednan Îbrahîm axivî û got: "Berxwedana serkeftineke mezin û derbeyeke li dijî faşîsta Tirk bû. Rojiya mirinê û berxwedana rêbaza yekane ya sekna li dijî zordariyê bû."

MINBIC

Li kantona Minbicê jî Tevgera Ciwanên Şoreşger meşeke meşaleyî li dar xist. Di meşê de endamên tevgerê, xet, meclisên bajêr, Meclisa Kombûna Jinan a Zenûbiya, Yekitiya Jinên Ciwan, Desteya Ciwan û Werzîşê, Meclisa Idlibê ya Partiya Sûriya Pêşerojê û ciwanên Minbicê beşdar bûn.

Meş ji Çerxerêya Mîzan ve dest pê kir û heta bi pêş Stadyûma 4ˊê Nîsanê çû.

Li wir, hevserokê tevgerê Hisên Begarî axivî û got: "Berxwedana hevrêyên me di 14ˊê Tîrmehê de li girtîgehên faşîtê Tirk rola ciwanan ava kir ku xwe li ser fikir û felsefeya Rêber Abdullah Ocalan bi rêxistin bikin. Bi rihê berxwedana hevrêyên me em peyameke ji ciwanên Sûriyeyê re dişînin bi taybet ên li herêmên dagirkirî û dibêjin li dijî dagirkeriya Tirk serî hildin. Divê em Sûriyeyî têkoşîna xwe bikin yek, xaka xwe rizgar bikin û dagirkeriyê derxin."

(fr)

ANHA